MDB statistika Komitəsinin son yaydığı cədvələ görə, Müstəqil Dövlətlər Birliyinə (MDB) daxil olan ölkələr arasında həm nominal, həm də real orta aylıq əmək haqqında ən az artım Azərbaycanda qeydə alınıb. Hesablamalara görə, cari il Azərbaycanda orta aylıq əmək haqqının nominal dəyəri 3%, real dəyəri cəmi 0.6% artıb. MDB ölkələri arasında ən çox əmək haqqı Rusiyada verilib. Cari ildə Rusiyada orta aylıq əmək haqqı 662,6 dollara (43 min 400 rubl) bərabər olub. Rusiyadan sonra ikinci sırada Belarus qərarlaşıb. Bu ölkədə orta aylıq əmək haqqı 447,7 dollar (958,1 rubl) olub. Azərbaycan bu siyahıda 6-cı sırada yer alıb.
Məsələyə münasibət bildirən Əmək və Əhalinin Sosial Müdafiəsi naziri Sahil Babayev deyir ki, Azərbaycanda miminimum əmək haqqı artımları 2019-cu ilin martından etibarən tətbiq olunub və artım 40%-dir.
Bu sözləri Anews.az-ın suallarına cavab olaraq Əmək və Əhalinin Sosial Müdafiəsi naziri Sahil Babayev deyib. “Biz o cədvələ baxmalıyıq. Mən bir şeyi vurgulayim ki, Azərbaycan bu günləri minimum pensiya üzrə MDB məkanında Qazaxıstanla birlikdə ilk iki yeri bölüşür və ona görə də, siz dediyiniz statistika hansı dövrü əhatə edir dəqiqləşdirmək lazımdır”, – deyə nazir bildirdi.
Nazir həmçinin bildirdi ki, artıq sosial islahatların yeni paketi də hazirlanır.
“Cənab prezidentin təşəbbüsü ilə son bir il ərzində 3 milyon insanı əhatə edən islahatlar paketi həyata keçirilib. Bu islahatlar paketinin nəticəsində, həm mimnimum əmək haqqında ciddi artımımız olub, həm də minimum penisiyalarımız ciddi şəkildə artib. Bundan əlavə, sosial ödənişlər, müavinətlər və təqaüdlər də 2 dəfə artıb. Artıq sosial islahatların yeni paketi də hazirlanır və yaxın günlərdə həm əmək haqqları ilə bağlı, həm də pensiyalarla bağlı təkliflərimizi hazırlayıb cənab prezidentə təqdim edəcəyik”, – deyə Əmək və Əhalinin Sosial Müdafiəsi naziri Sahil Babayev əlavə edib.
Nazirin açıqlamasını şərh edən iqtisadçı Rövşən Ağayev isə deyir ki, Azərbaycanın MDB-də ən az əmək haqqı artımı edən ölkə olmasına təəccüblənmir və ölkədə 40% artımdan söhbət gedə bilməz.
“2015-ci ildə Azərbaycan iqtisadiyyatında iqtisadi artım 1.2% oldu, 2016-cı ildə 3.1% azaldı, 2017-ci ildə sabit qaldı, 2018-ci ildə isə 1.1% artım qeydə alındı. Ümumilikdə, 4 idlə Azərbaycan iqtisadiyyatı 0.5% azalıb. Belə bir durumda əımək haqqlarının ciddi şəkildə artması, hətta 40%-lik göstəricinin olması mümkün deyil. Çünki, əmək haqqları o zaman artır ki, ölkədə milli gəlir artır. Azərbaycanda isə, hələlik bu baş verməyib və 40%-lik artımdan söhbət gedə bilməz. Ola bilər ki, nazir büdcə sektorundakı müəyyən artımları nəzərdə tutub artımdan danışır, amma Azərbaycan iqtisadiyyatı da təkcə büdcə sektorundan ibarət deyil və özəl sektorda da 700 mindən çox maaş alan insan var”, – deyə iqtisadçı Rövşən Ağayev bildirdi.
