“Ancaq haqqında cinayət işi açılan insanlar axtarışa verilir. Əgər kimsə istintaq zamanı qaçıbsa müstəntiq, məhkəmə prosesi zamanı qaçıbsa, məhkəmə qərar verərək həmin şəxsi axtarışa verə bilər. Axtarılanlar əsasən, hansısa cinayətdə şübhəli bilinən, yaxud itkin düşən şəxslər olurlar. Cinayət işi açılmasa və ya itkin düşmə faktı olmasa axtarış elanı verilə bilməz. Axtarışla bağlı şəxsin qeydiyyatda olduğu ərazi üzrə polis idarəsi və məhkəmə orqanı cavabdehdir”.

Borculu şəxslərə də cinayət işi açıldığını deyən M.Hacıyev, onların borcu ödədikdən sonra sərbəst buraxıldığını bildirib:

“Borclu qismində axtarışlar da cinayət işi açılmadan başlaya bilməz. Məsələn, Vergilər Nazirliyində də istintaq şöbəsi var ki, vergilərdən yayınan şəxslər barəsində cinayət işi qaldırırlar. Yalnız bundan sonra vergidən yayınan şəxslərin axtarışına başlanıla bilər. Bu, digər orqanlara da aiddir. Banklar, marketlər, mağazalar və digər borcu qaytarmayan şəxslər barəsində polisə məlumat verdikdən və şəxsin barəsində cinayət işi açıldıqdan sonra axtarışlara start verilə bilər. Bundan əlavə, borca görə ölkədən çıxışına qadağa qoyulan şəxslər də sərhəd keçid məntəqələrində saxlanılır. Borca görə saxlanılan şəxslər müvafiq orqana təhvil verilir, borcu ödənildikdən sonra sərbəst buraxılır”.