“Son on ildə Bakı şəhərində qarlı-şaxtalı günlərin sayında azalma müşahidə olunur”.

Bunu Ekologiya və Təbii Sərvətlər Nazirliyinin rəsmi “Facebook” səhifəsində “Ekspert saatı” verilişinin canlı yayımında nazirliyin Milli Hidrometeorologiya Xidmətinin rəisi Umayra Tağıyeva bildirib.

“Ən sərt qış 1972-ci ildə olub. 2002-ci ildə dekabr ayı çox soyuq keçib. Həmin vaxt 18 dəfə arktik hava kütlələri daxil olmaqla, Abşeron yarımadasında şaxtalı günlərin sayını artırmışdı.

2012-ci ildə fevral ayında Xəzər dənizinin Nabrandan Sumqayıta qədər donması müşahidə olunub”, – deyə o qeyd edib.

Onun sözlərinə görə, yaxın günlərdə Bakıya qar yağması müşahidə olunmayacaq:

“Bu barədə uzunmüddətli proqnoz vermək mümkün deyil. İki-üç günlük proqnozlar daha etibarlıdır. Amma heç kim deyə bilməz ki, 2012-ci ilin fevral ayında müşahidə olunan qarlı, şaxtalı hava yenidən olmayacaq. Əgər belə olarsa, biz 2-3 gün qabaqcadan əhaliyə məlumat verəcəyik”.