İran Xarici İşlər Naziri Məhəmməd Cavad Zərif rəqiblərinin koalisiya hökuməti qurmasından sonra hakimiyyətdən getməsi gözlənilən İsrail Baş naziri Benyamin Netanyahu haqda fikirlərini bölüşüb.

Tvitter hesabındakı paylaşımda Trampla yanaşı, Ağ Evin keçmiş Milli Təhlükəsizlik üzrə müşaviri Con Bolton və ABŞ-ın keçmiş dövlət katibi Mayk Pompeodan bəhs edərək belə yazıb:

“Netanyahu da Bolton, Tramp və Pompeo kimi İran əleyhinə olan ortaqları ilə birlikdə tarixin zibil qutusuna doğru biabırçı səyahətə qatıldı”.

Zərif iranlıların zərər görməsini istəyənlər üçün bu talehin bir neçə minilliklər ərzində təkrarlandığını, artıq yolu dəyişməyin zamanının gəldiyini qeyd edib.

Xatırladaq ki, martın 23-də İsraildə keçirilən seçkidən sonra ölkə prezidenti Reuven Rivlin koalisiya hökuməti qurmaqda Baş nazir Netanyahunu məsul tutmuşdu. Netanyahu koalisiya hökuməti qurmaq üçün kifayət qədər dəstək tapa bilmədiyi üçün bu missiyanı mayın 4-də Rivlinə geri qaytarmışdı.
Daha sonra prezident mayın 5-də koalisiya hökuməti qurmaq səlahiyyətini Netanyahudan onun rəqibi, “Gələcək var” partiyasının rəhbəri Yair Lapidə verib. Yair Lapid dünən axşam 7 müxalifət partiyası ilə birlikdı koalisiya hökuməti qurmaq barədə qərar qəbul edib.

Netanyahunu kürsüsündən uzaqlaşdıracaq koalisiya hökumətini qurmaq üçün 14 iyuna qədər parlamentdə etimad andı içilməlidir.

Sfera.az