Emin Əmrullayevin Təhsil naziri kimi fəaliyyətinin bir ili gələn ay tamam olacaq. Ötən bu bir il ərzində gənc nazir nə kimi işlərlə yadda qaldı? Elektron Kütləvi İnformasiya Vasitələrində və sosial şəbəkələrdə gənc nazirin fəaliyyəti ilə bağlı müxtəlif fikirlərə rast gəlinir. Emin Əmrillayev bir çox hallarda təhsil sistemində kök atmış korrupsioner məmurlara qarşı qəti addımlar atmamaqda günahlanırılır,təzadlı qərarlar verməkdə suçlandırılır.Bütün bunlar ayrı bir mövzudur. Bizi maraqlandıran başqa məsələdir. Məsələn, şəhər məktəbində təhsil almış,daha sonra dünyanın aparıcı universitetlərinin məzunu olmuş,idarəetmə ixtisası üzrə magistr pilləsinə yiyələnmiş Emin Əmrullayevin Azərbaycanın kənd məktəblərindən zərrə qədər də olsa təsəvvürü varmı? Kənd məktəblərində tədrisin keyfiyyətindən, məktəblərin bərbad vəziyyətdə olduğundan görəsən gənc nazirin xəbəri varmı.

Məlum olduğu kimi hər il dövlət büdcəsindən məktəblərin təmir-tikintisinə, təhsilin inkişafına lazımınca vəsait ayrılır. Amma bu vəsaitlərin hansı məqsədlər üçün sərf olunması müəyyən suallar yaradır. Məsələn, Təhsil Nazirliyi Ərazi Maliyyə Hesablaşma Mərkəzləri vasitəsi ilə orta məktəblərdə odun yanacağının alınmasına il ərzində nə qədər vəsait ayırır? Bundan görəsən bir nazir kimi Emin Əmrullayevin xəbəri varmı? Onun yadına salmaq istəyirik ki,Təhsil Nazirliyi Ərazi Maliyyə Hesablaşma Mərkəzləri tərəfindən kənd məktəblərinin isidilməsi məqsədi ilə odun yanacağının alınması üçün ayrılan vəsaitlər demək olar ki,talan edilir.Burada quru odun yanacağının qiymətləri ya gizlədilir və yaxud da çox yüksək yazılır.Odun yanacağının alınması isə sual altındadır.

Bütün bunlara Təhsil Nazirliyinin 10 saylı Ərazi Maliyyə Hesablaşma Mərkəzi tərəfindən elan olunmuş tenderlərdə də yol verildiyi açıq-aydın görsənməkdədir. Mərkəzin əhatə dairəsində olan bu rayonlardan Tərtərdə 47 ümumtəhsi, 4 məktəbdənkənar müəssisə, Ağdamda 134 ümumtəhsil məktəbi və 5 məktəbdənkənar müəssisələr, Ağcabədidə 1 ibtidai, 11 ümumi orta məktəb, 1 məktəb-lisey, 49 tam orta və 5 məktəbdənkanar təhsil müəssisəsi, Respublikanın 15 şəhər və rayonunda fəaliyyətini davam etdirən Laçın rayonunda 5 məktəbdənkənar təhsil müəssisəsi, 111 ümumtəhsil məktəbi,Respublikanın 7 şəhər və rayonlarında fəaliyyətlərini davam etdirən Füzuli rayonu üzrə 5 məktəbdənkənar təhsil müəssisəsi,81 ümumtəhsil məktəbi, Respublikanın 5 şəhər və rayonlarında fəaliyyətlərini davam etdirən Xocavənd rayonu üzrə 17 ümumtəhsil məktəbi var. Qeyd edək ki, bu təhsli müəssisələrinin böyük əksəriyyəti rayon mərkəzlərində,bir çox qaçqın məktəbləri isə Bakı və Sumqayıt şəhərlərində yerləşir.

Bu 6 rayonda ümumilikdə fəaliyyətdə olan 380-ə yaxın ümumtəhsil müəssisələri il ərzində nə qədər odun yanacağı istifadə edər? Bəri başdan onu da xüsusilə vurğulamaq istərdik ki, məktəblərin böyük əksəriyyətində odun yanacağı valideynlərdən toplanan pullar hesabına alınır. Bunu rayon yerlərində,kəndlərdə ən azı bir qohumu yaşayan hər kəs bilməmiş deyil. Rayon mərkəzlərindəki orta məktəblərin bir çoxu isə qazanxana sistemi ilə təchiz edilib. Dərslərin sentyabr ayından başlayaraq,iyun ayında qurtardığını götürdükdə və Respublikanın iqlim şəraitini nəzərə aldıqda, orta məktəblər neçə ay qızdırılır? Sentyabr, oktayabr aylarında havaların o qədər də soyuq olmadığını və bu rayonların dağlıq ərazilərdə yerləşmədiyini nəzərə alsaq noyabr ayından orta məktəblər qızdırılmağa başlayır. Məktəblərin hamısı bir növbəli olduğundan günortaya qədər qızdırılır. Bu hesablama ilə sözügedən rayonların məktəblərində cəmi 5-6 ay, noyabr-mart aylarında orta məktəblər qızdırılır.Bu beş aya düşən şənbə,bazar günlərini və bayramları çıxsaq cəmi dörd ay olur. Tərtər, Ağdam, Ağcabədi, Laçın, Füzuli və Xocavənd rayonlarında bir növbəli orta məktəblərin dörd ay qızdırılmasına Təhsil Nazirliyi 10 saylı Ərazi Maliyyə Hesablaşma Mərkəzi nə qədər vəsait ayırsa yaxşıdır?

Təhsil Nazirliyinin 10 saylı Ərazi Maliyyə Hesablaşma Mərkəzi tərəfindən odun yanacağının satın alınması üzrə 442163.12 manat məbləğində satınalma müqailəsi 22.06.2021-ci il tarixdə “KONEKS CONSTRUCTİON” Məhdud Məsuliyyətli Cəmiyyəti ilə bağlanmışdır.

Kommersiya qurumunun hüquqi şəxslərin dövlət reyestrinə daxil edilmiş məlumatlarında “KONEKS CONSTRUCTİON” Məhdud Məsuliyyətli Cəmiyyətinin 27.11.2019 il tarixdə İqtisadiyyat Nazirliyi yanında Dövlət Vergi Xidmətinin Bakı şəhəri Lokal Gəlirlər Baş İdarəsində dövlət qeydiyyatına alındığı göstərilir. Reyestr məlumatlarında nizamnamə kapitalı 10 manat olan MMC-nin hüquqi ünvanının BAKI ŞƏHƏRİ BİNƏQƏDİ RAYONU, SƏTTAR BƏHLULZADƏ, ev 39, m. 202, qanuni təmsilçisi kimi isə Osmanlı Vahid Cuma oğlu qeyd olunub.

10 saylı Ərazi Maliyyə Hesablaşma Mərkəzi 2019 və 2020-ci illərdə də odun yanacağının alınmasına məqsədi ilə satınalmalar həyata keçirmişdir.

Odun yanacağının satın alınması üzrə 294 992.83 manat məbləğində satınalma müqailəsi 26.02.2020-ci il tarixdə “TƏCHİZAT-RA” Məhdud Məsuliyyətli Cəmiyyəti ilə bağlanmışdır.

Istilik enerjisinin (odun yanacağının) satın alınması üzrə 298 799.6 manat məbləğində satınalma müqailəsi 25.22.2019-ci il tarixdə “TƏCHİZAT-RA” Məhdud Məsuliyyətli Cəmiyyəti ilə bağlanmışdır.

Kommersiya qurumunun hüquqi şəxslərin dövlət reyestrinə daxil edilmiş məlumatlarında “TƏCHİZAT-RA” Məhdud Məsuliyyətli Cəmiyyətinin Ağdam rayon Vergilər Şöbəsində 06.02.2019-cu il tarixdə dövlət qeydiyyatına alındığı bildirilir. Nizamnamə kapitalı 10 manat olan MMC-nin hüquqi ünvanı AĞDAM RAYONU, İMANQULUBƏYLİ, qanuni təmsilçisinin isə Qədimov İnqilab Əsgər oğlu olduğu göstərilir.

Satınalmaların vahid elektron portalına yerləşdirilimiş məlumatlardan da göründüyü kimi 25.22.2019-ci il tarixdən 26.02.2020-ci il tarixə,yəni cəmi iki aya 10 saylı Ərazi Maliyyə Hesablaşma Mərkəzi odun yanacağının satınalmasına 593 792 manat dövlət vəsaiti ayırıb.

Qeyd edək ki,2016-cı ildə Təhsil Nazirliyinin Ərazi Maliyyə Hesablaşma Mərkəzlərinin yaradılmasında məqsədi şəhər və rayonlar üzrə nəzərdə tutulmuş təhsil xərclərinin,təhsil sahəsində maliyyə və inzibati resursların idarə edilməsinin təkmilləşdirilməsi və mərkəzləşdirilmiş maliyyələşdirilməyə mərhələlərlə keçirilməsindən ibarət olub. Eyni zamanda bu qurumun əsas vəzifəsi təhsilə ayrılan vəsaitin xərclənməsinə nəzarət etmək və büdcə mənimsəmələrinin qarşısın almaqdır.

Lakin məlumatlardan da göründüyü kimi 10 saylı Ərazı Maliyyə Hesablaşma Mərkəzi dövlət vəsaitlərini səmərəli xərclənməsinə heç də ciddi nəzarət edə bilmir və yaxud da etmir. Məlum olduğu kimi koronavirus pandemiyasının bütün dünyaya yayılması ilə əlaqadər ölkəmizdə qabaqlayıcı tədbirlər həyata keçirilmiş,Nazirlər Kabinetinin Qərarı ilə karantin rejimi elan olunmuş, orta məktəblərin fəaliyyəti qeyri müəyyən müddətə dayandırılmış, 2020-2021-ci tədris ili Azərbaycan Respublikasının təhsil müəssilərində dərslər onlayn formatda keçirilmişdir. Yəni hər yerdə olduğu kimi 10 saylı Ərazı Maliyyə Hesablaşma Mərkəzinin tabeçiliyində olan rayon məktəbləri də bağlı olub. Belə olan halda 2020-ci tədris ili üçün alınmış (alınıbmı?) odun yanacağı hara sərf olunub? Dövlət satınalmalarının vahid portalında yerləşdirilmiş məlumatlara görə 10 saylı Ərazı Maliyyə Hesablaşma Mərkəzi son üç il ərzində yalnız odun yanacağının alınmasına 1 035 995 manat vəsait xərcləyib. Yuxarıda qeyd etdiyimiz kimi, karantin rejimi ilə əlaqədar fəaliyyəti dayandırılmış məktəblər necə qızdırılıb? Məktəblər bağlı olduğu halda dövlətin ayırdığı vəsaitlər hara xərclənib? Bu Hesablaşma Mərkəz tərəfindən odun yanacağı adı altında dövlət vəsaitlərinin təyinatından kənarlaşdırılması deyilmi?

Yuxarıda qeyd etdiyimiz kimi,son vaxtlar rayonlarda və kəndlərdə yeni qaz xətlərinin çəkilməsi ilə əlaqədar məktəblərə odun yanacağının alınması üçün külli miqdarda dövlət vəsaitinin ayrılmasına ehtiyac qalmır. Ona görə də 10 saylı Ərazi Maliyyə Hesablaşma Mərkəzinin odun yanacağının alınması ilə bağlı elan etdiyi tenderlərdə qanun pozuntularına yol verilməsi qənaətinə gəlməmək olmur. İsitmə sistemi quraşdırılmamış məktəblərdə isə odun yanacağının valideynlərin hesabına alınması heç kimə sirr deyil. Bəs bir neçə ay ərzində rayon məktəblərinə odun yanacağının alınması məqsədi ilə ayrilmış 593 792 manat dövlət vəsati necə olub? Biz bir mətbuat orqanı olaraq Azərbaycan Respublikasının Hesablama Palatasından və Respublika Prokurorluğu yanında Korrupsiyaya Qarşı Mübarizə Baş İdarəsindən bu vəsaitlərin təyinatı üzrə xərclənib,xərclənməmməsinə aydınlıq gətirilməsi üçün yoxlamaların təşkil olunmasını tələb edirik. Çünki 10 saylı Ərazi Maliyyə Hesablaşma Mərkəzinin rəisi Zahid Təhməzovun mətbuata cavab verməyə vaxtı yoxdu,başı nələrə qarışıb bəlli deyil.

Aktualinfo.org