“150 manat onun özünə görə, 50 manat da baxıcı pulu olaraq. Bu pul böyük məbləğ olmasa da, Şahinin dərmanlarını, gündəlik tələbatlarını qarşılamağa yardımçı olurdu. Lakin Şahinin 18 yaşı tamam olandan sonra, müavinət kəsildi və hara getsək də, bu müavinəti bərpa edə bilmədik. Dəfələrlə Bakıya gəlib-getmişik, qardaşım xəstə uşaqdır, hər dəfə yol keçəndə qorxuram ki, indi özünü atacaq maşının altına… Sizdən xahiş edirəm, bu məsələnin həllinə kömək edin”, – deyə İ.İsmayılov deyib.

O qeyd edib ki, ötən il iyul ayında Şahin İsmayılov 15 gün Salyan Rayonlararası Psixiatriya Xəstəxanasında müayinə və müalicə keçib, ordan verilən rəyi də Sabirabad Şəhər Xəstəxanasının Poliklinikasına veriblər.

Şahin İsmayılov

“Bir müddət sonra isə bizə dedilər ki, Bakıdan rədd cavabı gəlib, Şahin yenidən müayinə və müalicə keçməlidir. 2021-ci ilin yanvarın 15-də yenidən Şahini apardıq Salyandakı psixiatriya xəstəxanasına. Orda 15 gün yatdı, yenidən həkim rəyini Sabirabada gətirdik, bu dəfə isə bizi göndərdilər Bakıda Göz İnstitutunun yanında olan Respublika Əlillərin Bərpa Mərkəzinə. Ordan dedilər ki, yox, müavinətin bərpası üçün Şahin mütləq Maştağada olan 1 Saylı Respublika Psixiatriya Xəstəxanasında yatmalıdır. Şahinin 6 ayda 2 dəfə Salyanda müayinə və müalicə keçməsi hesaba alınmadı”, – deyə şikayətçi qeyd edib.

İ.İsmayılovun sözlərinə görə, artıq neçə aydır Sabirabad-Maştağa yolunda qalıb.

“Nə vaxt ora getsək, bizə deyirlər ki, indi yerimiz yoxdur, qəbul edə bilmərik. Artıq neçə aydır eyni cavabı eşidirəm. Düz 1 il 1 aydır ki, Şahinin müavinəti dayanıb, biz bilmirik dərdimizi kimə deyək”.

Məsələni ayırd etmək üçün, adıkeçən Respublika Əlillərin Bərpa Mərkəzinə və 1 Saylı Respublika Psixiatriya Xəstəxanasına zəng etdik. Təəssüf ki, hər iki nömrədə zənglərimizə cavab verən olmadı.