Sabiraabad rayon təhsilinin rüsvayçı durumu ilə bağlı mediada zaman-zaman yazılar dərc olunub.
Təsəvvür edirsiniz ali məktəblərə qəbula görə, Sabirabad ölkədə sonuncu yerlərdədir. Bu azmış kimi rayon məktəblərində rüşvət halları baş alıb gedir. Məktəb direktorları müəllimlərin adına kredit götürüb qaytara bilmirlər. 20-30 müəllim götürmədikləri kreditə görə əmək haqqı ala bilmirlər. Və məktəb direktoru həbs olunur. Ən dəhşətlisi odur ki, məktəb direktoru təcridxanadan ultimatum göndərir ki, məni azad etməsəniz, məhkəmədə icra başçısının adını çəkəcəm. Və tezliklə məktəb direktoru azad ounur.
Rayondakı başqa bir məktəbdə məktəb direktorunun şagirdə təcavüz etməsi lap rüsvayçılıqdır.
Digər bir fakt.
Sabirabadın təhsil şöbəsinin müdiri açıq şəkildə bəyan edir ki, icra başçısına pul verməkdən yorulmuşam: “İcra başçısı mənə deyir ki, neçə kilometr yol çəkdir, abadlıq işlərinə pul ver və s “.
Bunlar rayon təhsilinin real durumunu göstərir.
Hələ rayondakı məktəblərin at tövləsinə oxşaması da başqa bir yazının mövzusu olub.
Bu günkü yazı isə rayondakı məktəblərin daha acınacaqlı durumda olmasını göstərir.
Gundelik-Bakı-ya daxil olan məlumata görə, rayonun Hacıbəbir kənd orta məktəbi qəzalı vəziyyətdədir, tavan uçub, döşəmə bərbad haldadır.
Məktəbin hasarı olmadığı üçün bütün günü məktəbin həyətində heyvanlar otlayır. Bilmək olmur ki, bura məktəbdir, yoxsa örüş yeri…
Əgər təkcə, Hacıbəbir kənd məktəbi bu durumda olsaydı, bəlkə də həyəcan siqnalı çalmağa ehtiyac qalmazdı. Rayonda 85 məktəb fəaliyyət göstərir, həmin məktəblərdə 28 min 298 şagird oxuyur, 2 min 803 müəllim dərs deyir. Rayondakı məktəblərin ümumi durumu ürək açan deyil.
Görəsən, rayon icra hakimiyyətinin başçısı Siraqəddin Cabbarov hara baxır ?
Bəs rayon təhsil şöbəsinin müdiri Pəhlivan Qarayev nə işlə məşğuldur..?
Bəs, Milli Məclisin Sabirabaddan olan deputatı Ramin Məmmədov bu rəzaləti görmür ?
Yaxşı təhsil nazirimiz Emin Əmrullayev də bu durumu görməzdən gəlir ?
Cənab nazir yəqin ki, yazıya əlavə edəcəyimiz VİDEO-ya baxacaq.
Cənab Əmrullayev !
Videodakı gül balalar heyvanlarla bir yerdə məktəbdə olmaqdan beziblər, uçuq-qəzalı otaqlarda dərs keçməkdən qorxurlar, onlar da təzə, təmirli məktəb istəyirlər.
Axı, son 15-20 ildə cənab Prezident İlham Əliyevin və Birinici vitse-prezident Mehriban xanım Əliyevanın təhsil sahəsinə, məktəblərə göstərdiyi qayğıdan hamı danışır. Bəs niyə sizin xəbəriniz yoxdur ?
Körpə məktəblilər sizə müraciət edir cənab nazir, sizdən kömək istəyirlər.