Pulun qalığını qaytarmağa imkanı olmayıb, müştərinin aldığı malları qaytarmaq sözün bütün mənalarında axırıncı variantdır və bu variant “Araz” marketlər şəbəkəsində ilk varianta çevrilib.

Doğrusunu deyəcəyəm: ilk dəfə idi bu qədər həyasız, əxlaqsız bir “xidmətlə” rastlaşırdım – çünki aldıqlarım arasında çörək də var və yaxında başqa mağaza olmaya da bilərdi; buna görə də bu marketlər şəbəkəsində son 2 ay ərzində müşahidə etdiklərimi yazmasam olmaz.

“Araz” marketlər şəbəkəsi hər zaman məkanı daha uğurlu və çevik seçir: yeni, daha böyük yaşayış komplekslərinin birinci mərtəbəsini anında icarəyə götürür və yaxud bina hətta tikilib təhvil verilməmiş artıq fəaliyyətə başlayır. Bu səbəbdən ərazidə tədricən məskunlaşan müştərilərdə özünə qarşı alışqanlıq yaradır.

Bu şəbəkənin gördüyü iş bundan ibarətdir: alışqanlıq, müştərinin mağazaya “öyrəşdirilməsi”. Vəssalam, “xidmət” bununla da bitir!

Bakıdakı market şəbəkələri içərisində ən rüsvayçı səviyyədə işləyən “Araz” marketdir:

– Bu marketdə son 3 aydır girişdə dezinfeksiyaedici məhlullar qoyulmur, istifadəsi tələb edilmir;

– Bu marketə girişdə müştərilərə nəzarət edəcək (maskası olub-olmamasına və yaxud hansısa vacib məqamlara görə) təhlükəsizlik əməkdaşını görə bilməzsiniz;

– Bu marketdə kassalar heç vaxt hamısı işləmir və yaxud kassalar tələbdən qat-qat azdır;

– Bu marketdə kassaların “mal daşıyıcısı” heç vaxt çalışmır və həmişə çirkli olur;

– Bu marketdə kassirlər ayaqüstə olur, müştəri ilə şüşə arakəsmə yoxdur, birbaşa təmasa girirlər;

– Aldığın məhsulları kimsə qablaşdırmır, yardım edən yoxdur, hətta sellofan torbalar da əl altında deyil, yalnız xahişlə verilir;

– Əsasən, kiçik ölçülü sellofan torba təqdim edirlər və aldığın məhsul bir normal sellofan torbaya yerləşə biləcəyi halda, sən məcbur olub 4-5 sellofan torbadan istifadə etməli olursan – nə sirdirsə, böyük sellofan torbalar olsa belə, satıcılar vermək istəmir, sanki müştərilərə daha çox kiçik torba sırımaq öhdəlikləri var;

– Bu marketdə xüsusən kənd təsərrüfatı məhsulları və yaxud şirniyyat bölməsində satıcı tapılmır, mütləq başqa bölmədən satıcılar çağırmalı olursan;

– Bu marketdə müştərinin deyil, yalnız özlərinin istədiklərini təklif edirlər. Məsələn, qəfildən hansısa çay, qənd və yaxud gigiyenik vasitə markası yoxa çıxır, əvəzində yeni məhsul peydə olur. İnadla öz “sevimli brendini” axtarsan da, tapa bilməzsən. Halbuki ətrafdakı bütün mağazalarda həmin məhsullar var. Bu isə o deməkdir ki, “Araz” market hansı məhsulları satmasına nəyinsə müqabilində özü qərar verir – müştərinin nə istəməsi maraqlı deyil;

– Bu marketdə, məsələn, reklam olmaması üçün adını çəkmədiyimiz digər marketlər şəbəkəsində mövcud olan məhsul çeşidlərinin heç yarısı belə yoxdur və s.

O ki qaldı bu mağazadakı bahalığa, bu ayrıca araşdırmanın mövzusudur – müqayisəli təqdim etmək gərəkdir.

Ancaq “Araz” marketlər şəbəkəsinin artıq qurduğu sistemin öhdəsindən gələ bilmədiyi gün kimi aydındır. Xüsusilə “Favorit” marketləri ilə birləşəndən sonra bu şəbəkədə qeyri-peşəkarlıq artır, xidmət sıfırdır, yalnız və yalnız daha çox qazanmaq hədəflənib.

Torbadan qənaət edən, kassaya işçi qoymayan bir marketdən başqa nə gözləmək olar ki!

P.S. Yazdıqlarıma azacıq şübhə edənlər vərdiş etdikləri “Araz” marketdən çıxıb, yaxınlıqdakı digər şəbəkəyə müraciət edə bilərlər.

Dünən bunu etmək məcburiyyətində qaldım və doğrudan təəccübləndim: nə qədər böyük fərq var və mən aylardır niyə fərqi yoxlamamışam?

Çünki bütün marketlərdə xidmətin bu səviyyədə olduğunu düşünmüşəm – təhtəlşüuri olaraq. Dünən satıcının o addımından sonra məcburi başqa marketlər şəbəkəsinə daxil olduqda isə tam fərqli mənzərə gördüm.

Bir daha “Araz”dan istifadə etməyəcəyəm – bu, artıq qəti qənaətimdir!