Ötən həftə sosial şəbəkədə maraqlı bir statusla qarşılaşdım. Belə ki, tanınmış jurnalistlərdən biri özünün “Facebook” səhifəsində Dövlət Turizm Agentliyinin (DTA) sədri Fuad Nağıyevin, özünün təbirincə desək, “ilin-günün bu vaxtı” Covid-ə yoluxduğu haqda açıqlama verdi.

Əlbəttə, Fuad Nağıyevin hansısa xəstəliyə yoluxması maraqlı bir hadisə deyil, bu, hər kəsin başına gələ bilər. Amma DTA rəhbərinin bu xəstəliyə yoluxmasından necə və hansı şəraitdə xəbərdar olması, həmçinin bütün “önləyici tədbirlərə” rəğmən, yenə də bu virusa yoluxması kifayət qədər düşündürücüdür. Hansı ki, həmkarım da məhz bu haqda yazır:

“Deyilənə görə, o, bunu (Covid-ə yoluxduğunu – müəl.) araq içərkən dad hiss etmədiyindən anlayıb. Dərhal bir qədəh də süzdürüb, “do dna” vurub, üstündən bir göyçə dişləyib, görüb yox e, dad nə gəzir?! “Atalar üçdən deyib” prinsipi ilə birini də süzdürüb, gözünü yumub başına çəkib, deyib, “net” balam, alınmır – “kartinka” var, dad yox. Sonra qızdırma başlayıb. PSR, o yan-bu yan, Covid təsdiqlənib. “Müdir”i aparıb bağda təcrid eləyiblər, yanına ancaq sürücü və tibb bacıları gedə bilirlər.

Bu məşum olaydan sonra bütün agentlik, Fuad Nağıyevi tanıyan-bilən baş sındırır ki, necə olub, spirtin Covidi nisbətən dəf etməsi üzrə dünya alimlərinin tövsiyyələrini ciddi şəkildə nəzərə alaraq, bədənini damarlarının içinə qədər mütəmadi spirtləyən Fuad Nağıyev bu virusa yoluxub?

Yoluxub, Allah şəfa versin. Ehtiyat elədiyim odur ki, Turizm Agentliyi rəhbərinin xəstəliyini əsas gətirərək, Pirqulunun, Göygölün, Qaxın qapılarını turistlərin üzünə bağlayalar”.

Sədrin içki həvəsi

Doğrusu, jurnalistin bu statusu xeyli marağıma səbəb olduğundan, DTA-da olan tanışlarımdan biri ilə əlaqə yaradıb, bu məsələ ilə bağlı ətraflı məlumat əldə etməyə çalışdım. Onunla söhbətimdə məlum oldu ki, həqiqətən də Fuad Nağıyevin spirtli içkilərə həvəsi böyükdür. Onu yaxından tanıyanlar deyir ki, agentlik rəhbəri içki masasına oturdumu, onu oradan qaldırmaq çətin məsələdir, ayaqları sözünə baxmayanadək içəcək, yekunda isə sürücüsünün və ya masa yoldaşlarından ayıq olanların dəstəyi ilə maşına salıb evinə göndərəcəklər. İddia olunur ki, bu vəziyyət demək olar, hər gecə təkrar olunduğundan cənab Nağıyev işə adəti üzrə nahardan sonra gəlir. Katibəsinin gətirdiyi bir-iki fincan tünd qəhvəni başına çəkdikdən sonra “paxmel”dən ayılan cənab sədrin yadına düşür ki, yenə də axşamdan günün birinci yarısına təyin olunan rəsmi və ya qeyri-rəsmi görüşləri yaddan çıxarıb. Odur ki, dərhal görüş verdiyi adamlarla əlaqə saxlayıb yarı rus, yarı Azərbaycan türkcəsində üzrxahlıq edir, görüşün zamanını dəyişir. Təbii ki, təxirə salınan görüşün reallaşması da DTA rəhbərinin axşam nə qədər içəcəyinə bağlıdır. Əgər “doza” “gündəlik təlabat”dan artıq olacaqsa, ikinci dəfə təyin olunan görüş də baş tutmaya bilər…

Bir haşiyə də çıxım ki, DTA-da Fuad Nağıyevin ingiliscə də mükəmməl danışdığını deyirlər. Nə qədər olmasa da, şəxsi anketində 1998-ci ildə İngiltərənin Birminhem Universitetində Avropa Şurasının İnsan hüquqları üzrə hüquq və təcrübə proqramında təhsil aldığı yazılır. Amma onun indiyədək əcnəbi qonaqlarla ingilis dilində danışdığını nə görən, nə də eşidən olub.

Turizm sektorunun əhəmiyyəti

Dəyərli oxucularımıza bəlli oldugu kimi, qeyri-neft sektorunun inkişafında turizmin böyük yeri var. Heç də təsadüfi deyil ki, dövlətimiz son illər bu sahəyə böyük maraq göstərdiyindən, turizmi inkişaf etdirmək məqsədilə hər il büdcədən külli miqdarda vəsait ayrılır. Lakin çox təəssüflə qeyd olunmalıdır ki, Dövlət Turizm Agentliyi rəhbərinin başı “daxili orqanlarını spirtləməyə” qarışdığından rəhbərlik etdiyi sahədə olub-bitənlərdən tamamilə xəbərsizdir. Belə görünür ki, cənab Nağıyev öz səlahiyyətlərini qeyri-rəsmi olaraq müavini Azadə xanım Hüseynovaya və DTA-nın Baş müşaviri Avstriya vətəndaşı Florian Zenqstşmitə həvalə etdiyindən, onların və digər rəsmi şəxslərin rəhbəri layiqincə əvəz edəcəklərinə arxayındır. Ona görə də, hər gün işə nahardan sonra gəlib, iş saatının bitməsini gözləmədən kabinetini tərk etməsini normal hesab edir. Deyir, sədr sıradan bir işçi deyil ki, hər gün səhər saat 9:00-da işdə olub, axşam 18:00-da evinə getsin.

Amma insaf naminə onu da deməliyəm ki, cənab Nağıyev işə gecikməyi adət etsə də, qonaqlıqlara, içki məclislərinə vaxtında, hətta hər kəsdən bir qədər də tez gəlir. Rəsmi tədbirlər zamanı isə özünü “gözə soxmağı” çox sevir, xüsusən də kameraların önündə. Bu haqda az sonra.

Florian Zenqstşmit kimdir?

Məlumat üçün bildirək ki, Avstriya vətəndaşı Florian Zenqstşmit DTA-nın Baş müşaviri və qurumun nəzdindəki Turizm Bürosunun rəhbəri olsa da, agentliyi o və qurumun digər məsul əməkdaşları idarə edir. Ümumiyyətlə, Florian Zenqstşmit turizm sahəsində böyük potensialı olan, bir çox inkişaf etmiş ölkələrlə geniş əlaqələrə malik, təcrübəli və müasir baxışlı şəxsdir. Bu sahədə bir çox uğurlu ideyaların müəllifidir. Necə deyərlər, çalışır ki, işini almansayağı ortaya qoysun. Odur ki, agentliyin əsas işi, rəsmi rəhbəri Fuad Nağıyev istisna olmaqla, Florian Zenqstşmit və qurumun digər rəhbər şəxslərinin üzərinə düşür.

Fuad Nağıyevin “ulduz xəstəliyi”

Fuad Nağıyevin rəsmi tədbirlərdə özünü “gözə soxmağı” sevdiyi haqda deyilənlərə gəldikdə, mənbə bildirir ki, DTA rəhbəri son vaxtlar ciddi şəkildə “ulduz xəstəliyi”nə yoluxub. Doğrudur, bu “xəstəlik” onu Covid-19 kimi yorğan-döşəyə salmayıb, amma axır zamanlar yaxın ətrafı DTA rəhbərinin qəribə hərəkətləri ilə bağlı əməlli-başlı narahat olmağa başlayıblar. Məsələn, istər ötən ay İslam Əməkdaşlığı Təşkilatının Turizm Nazirlərinin Bakıda keçirilən 11-ci konfransı, istər də həmin ərəfədə Şuşaya səfər zamanı Fuad Nağıyevin yeri gəldi-gəlmədi özünü kameraların önünə atması, öncədən onu çəkmələri ilə bağlı operatorlara tapşırıq verməsi heç də vəzifəsinə yaraşan bir hərəkət kimi qəbul edilməyib.

Bütün qonaqlar məscidə daxil oldu, Nağıyev isə…

Onu da dəyərli oxucularımızın diqqətinə çatdıraq ki, Fuad Nağıyevlə bağlı daha qəribə bir hadisə Heydər Məscidində namaz qılınması zamanı yaşanıb. Belə ki, hər kəs məscidə daxil olub ibadətlə məşğul olarkən DTA sədri tənha şəkildə məscidin qarşısında dayanıb. Onun bu vəziyyətini görən yaxın çevrəsi hələ də cavab tapa bilmir ki, həmin vaxt agentlik rəhbərinin ibadətlə məşğul olmasına nə mane olub: hər axşam “vurduğu” içkilər, namaz qıla bilməməsi, yaxud hansısa başqa səbəb?

Sonda onu da deyək ki, DTA-dakı mənbəmizlə söhbət zamanı yaxınlarının agentlik rəhbərini “Fatik” deyə çağırdığını da öyrəndik. Maraqlıdır ki, Azərbaycanda qeyri-neft sahəsinin inkişafı ilə bağlı ən çox sərmayə qoyulan və gələcəyinə böyük ümidlə yanaşılan turizm sektoruna “Fatik” kimi bir şəxsin rəhbərlik etməsi ilə istənilən nəticə əldə etmək mümkün olacaqmı?! Hər halda bu sual haqda ciddi düşünməyə dəyər. //Hurriyyet.az//