Sözüm İqtisadiyyat Nazirliyi yanında Vergilər Xidmətinin rəisi Orxan Nəzərliyədir. Daxil olan kütləvi şikayətin həqiqiliyini aydınlaşdırmaq üçün bu dəqiqələrdə “Türkan Sahil”- “Qızıl qum” İstirahət Mərkəzində olduq. Şikayətlər təsdiqini tapdı. Hacı Mirzə adlı ağsaqqalın olan bu obyektin girişində dayanıb içəri daxil olan hər kəsdən 10 manapt pul tələb edilir, içəridəki restoranda isə əlavə oturacağa yenə pul tələb olunur. Yerli Türkan sakinlərinin canını boğazına yığan Mirzə kişinin restoranında və daxilolma zamanı tələb olunan 10 manat rüsuma isə kassa qəbzi verilmir.
Biz də obyektə daxil oluruq. Qapıda dayanan oğlanla aramızda belə bir dialoq oldu:
-Sizdə çay verilir?
-Bəli.,.
-Onda şlaqbaumu açın…
-Yox, 10 manat ödəyin sonra…
-Biz çay içməyə gedirik. Çayı harda içəcəyik bəs? Ayaq üstə?
-Restoranda və çimərlik çətirlərində. Orda isə əlavə ödəniş verəcəksiniz…
-Buyurun, 10 manat, amma kassa qəbzi verin…
Oğlan tutulur.
-Yox, burda qəbz verilmir. Bura şəxsi obyektdir…
-Cavan oğlan, tikinti özəl obyekt ola bilər, amma dənizin suyu, qum yəqinki icarəyə götürülüb və bütün xidmətlərə görə alınan pul vəsaitlərinə qəbz verilib dövlətin vergisi ödənilməlidir…
Beləliklə, restorana piyada gedirik ki, su alıb içək. Müşahidə etdik, nə iaşə xidmətinə, nə digər xidmətlərə görə kassa qəbzi verilmir. Təxmini 1 saatlıq müşahidəmizdə (saat 16:30: dan 17 :30- dək) ərazidə 300 -350 nəfər var idi… Bizimlə qiyabi söhbət edən işçilərdən biri dedi ki, Mirzə kişi deyilən adam hərbi prokuror Xanlar Vəliyevin qudasıdır, onun bu ərazidə qudası ilə bir neçə şərikli obyekti var, ona görə də Vergilər Xidmətinin işçiləri qorxularından bura gəlmirlər…
Hörmətli Orxan müəllim! Türkan sakinlərinin adından soruşuruq: “odda yanmaz, suda batmaz” Hacı Mirzənin (obyetlərində araq, pivə, konyak və s. gen-bol satılır) bu qanunsuz əməllərindən niyə əməkdaşlarınızın xəbəri yoxdur? Gərək şikayət edilə, jurnalistlər iş-gücünü atıb bu istidə Türkana gedib faktı yerində araşdıra? İnanırıq ki, bu faktları Sizin də əməkdaşlarınız araşdırıb redaksiyamıza “(“Təzadlar” qəzetinə) cavab verəcəklər. //tezadlar.az//
