Azərbaycan Prezidenti yanında Əfv Məsələləri Komissiyasının növbəti iclası keçirilib. Qeyd edək ki, bu, komissiyanın ikinci iclasıdır. Ötən iclasda 120 müraciətə baxılıb. Əfv Komissiyasının növbəti iclasının yanvarın 24-də keçirilməsi nəzərdə tutulub. Zirveyolu.info-un məlumatına görə, Əfv Məsələləri Komissiyasının üzvü, hüquqşünas Əliməmməd Nuriyev “Şərq”ə açıqlamasında bildirib ki, hansı kateqoriyadan olan cinayəti törətməsinə baxmayaraq, hər kəsin müraciəti hərtərəfli araşdırılır.
Onun sözlərinə görə, iki iclasda 200-dən artıq müraciətə baxılıb: “Bilirsiz ki, Prezident İlham Əliyevin müvafiq Sərəncamı ilə 2023-cü il “Heydər Əliyev İli” elan olunub. İlin başlanğıcından etibarən bu çərçivədə çoxsaylı tədbirlərin həyata keçirilməsi planlaşdırılıb. Ulu Öndərin anadan olmasının 100 illiyi ilə bağlı əfv sərəncamının verilməsi də gündəmdədir. Çünki Azərbaycanın Əfv İnstitutu Ümummilli Lider tərəfindən 1995-ci ildə qəbul olunmuş Konstitusiyaya daxil edilib.
Bu baxımdan Ulu Öndərin yüzilliyi ilə bağlı, yəni anadan olmasının ildönümü ərəfəsində əfv sərəncamının imzalanması gözlənilir. Əfv Komissiyasının iclasları yanvarın 12-dən öz işinə başlayıb. İki iclasda iki yüzdən çox müraciətə baxılıb. İclaslar çox ətraflı və geniş müzakirələrlə müşayiət olunur. Bəzi hallarda iclaslar 3-4 saat çəkir. Bu da prosesin şəffaf və geniş müzakirədən keçməsinin göstəricisidir. Yeri gəlmişkən qeyd edim ki, Komissiyanın sədri Samir Nuriyev tərəfindən hərtərəfli şərait yaradılıb. Hər kəs istənilən müraciətlə bağlı öz fikrini açıq şəkildə bölüşür”.
Ə.Nuriyev vurğulayıb ki, indiyədək, yəni 1995-ci ildən bu yana Azərbaycanda 68 əfv sərəncamı olub:
“Sərəncamlar ümumilikdə 8 min 975 nəfərə şamil olunub ki, onların da 95 faizi cəzadan azad edilib. 32 əfv sərəncamı Ulu Öndər Heydər Əliyev tərəfindən, 36 isə Prezident İlham Əliyev tərəfindən imzalanıb. Vurğulamaq lazımdır ki, dövlət başçısının fəaliyyətində mərhəmət və humanizm təməl prinsiplərdəndir. 36 əfv sərəncamı da bunun bariz nümunəsidir. Sərəncamlar məhbusluqdan azad olmuş şəxslər üçün də yeni fürsət və imkanlar yaradır. Ümid edirik ki, azadlığa çıxmış insanlar ölkəmizin inkişafına öz töhfəsini verəcək”.
