20-24 fevral 2023-cü il tarixlərində Birləşmiş Ərəb Əmirliklərinin (BƏƏ) Abu Dabi şəhərində iki ildən bir təşkil olunan IDEX-2023 Beynəlxalq Müdafiə Sərgi və Konfransı keçirilir.
“Zirvə yolu” Müdafiə Sənayesi Nazirliyinin mətbuat xidmətindən verilən məlumata görə xəbər verir ki, Birləşmiş Ərəb Əmirliklərinin baş nazirinin müavini – prezident işləri üzrə nazir Şeyx Mansur bin Zayed Al Nahyanın açılışını etdiyi sərgidə Azərbaycanın müdafiə sənayesi naziri Mədət Quliyevin rəhbərlik etdiyi nümayəndə heyəti də iştirak edir.
Dünyanın 65 ölkəsindən 1350-dən çox qabaqcıl şirkət və 350 nümayəndə heyətinin qatıldığı IDEX-2023 Beynəlxalq Müdafiə Sərgi və Konfransında Müdafiə Sənayesi Nazirliyinin müəssisələrində istehsal olunan 145 adda müdafiə təyinatlı məmulatlar nümayiş olunur.
Sərgi zamanı müdafiə sənayesi naziri Mədət Quliyevin Birləşmiş Ərəb Əmirliklərinin dövlət və hökumət nümayəndələri, sərgidə iştirak edən bir sıra ölkələrin nümayəndə heyətlərinin rəhbərləri və aparıcı şirkətlərin təmsilçiləri ilə görüşləri nəzərdə tutulub.
IDEX-2023 Beynəlxalq Müdafiə Sərgi və Konfransı öz işini fevralın 24-dək davam etdirəcək.
