Ukrayna Silahlı Qüvvələrinin daha on pilotu döyüş təyyarələrini idarə etmək bacarıqlarını qiymətləndirmək üçün ABŞ-yə gələ bilər

“Zirvə yolu” xəbər verir ki, bu barədə CNN mənbələrə istinadən məlumat yayıb.

Bildirilib ki, qiymətləndirmə ABŞ Milli Hava Qvardiyasının Arizonadakı bazasında aparılacaq.

“Tanışlıq tədbiri mahiyyətcə Hərbi Hava Qüvvələrinin şəxsi heyəti ilə təmas və ABŞ Hərbi Hava Qüvvələrinin necə fəaliyyət göstərdiyini görməkdir”, – mənbə qeyd edib.

Onun sözlərinə görə, Amerika “F-16”larının Ukraynaya mümkün tədarükü ilə bağlı yeni məlumat yoxdur.

CNN açıqlayıb ki, ukraynalı pilotların uçuş üzrə təlim keçdiyinə dair heç bir əlamət olmasa da, onların Arizona bazasında olması ABŞ-nin Ukraynanı “F-16” ilə təmin etmək üçün qapını tamamilə bağlamadığını göstərir.

Xatırladaq ki, daha öncə ABŞ-nin NBC telekanalı iki ukraynalı pilotun döyüş təyyarələrini, o cümlədən “F-16” qırıcılarını idarə etmək bacarıqlarını qiymətləndirmək üçün ABŞ-də olduğuna dair məlumat yaymışdı.