Ucarda Mərkəzi Aran iqtisadi rayonu üzrə sayca 5-ci, ölkə üzrə isə 48-ci KOB dostu ofisi fəaliyyətə başlayıb.
“Zirvə yolu” xəbər verir ki, bu barədə İqtisadiyyat Nazirliyinin tabeliyindəki Kiçik və Orta Biznesin İnkişafı Agentliyindən (KOBİA) məlumat verilib.
Bildirilib ki, KOBİA-nın təşkilatçılığı ilə Ucar rayonunda bölgədə fəaliyyət göstərən sahibkarlarla görüş keçirilib. Tədbirdə 80-ə yaxın sahibkar və müvafiq dövlət qurumlarının nümayəndələri iştirak ediblər.
KOBİA-nın İdarə Heyətinin sədri Orxan Məmmədov və Ucar Rayon İcra Hakimiyyətinin başçısı Mənsur Məmmədov sahibkarlara göstərilən dövlət dəstəyi tədbirləri, rayonun iqtisadi potensialı və biznes imkanları barədə məlumat veriblər. KOBİA-nın dəstək və xidmətləri, eləcə də KOB dostu mexanizmi barədə məlumat da sahibkarların diqqətinə çatdırılıb, Ucar rayonu üzrə KOB dostu rayonun biznes ictimaiyyətinə təqdim edilib.
Qeyd olunub ki, KOB dostu regionda sahibkarlığın inkişafına, biznesin ehtiyacı olan dəstəyin yerində təmin olunmasına və çətinliklərinin operativ həllinə dəstək olacaq. Ucarda KOB dostunun fəaliyyətə başlaması rayonda yeni KOB subyektlərinin və bizneslərin yaranmasına öz töhfəsini verəcək.
Tədbirdə həmçinin, KOB dostu mexanizmi, KOBİA-nın mikro və kiçik sahibkarlara göstərdiyi dəstək barədə video çarxlar nümayiş olunub, sahibkarları maraqlandıran suallar cavablandırılıb.
Sonra tədbir iştirakçıları Ucar Gənclər Evində yerləşən KOB dostu ofisində sahibkarlara dəstək və xidmətlərin göstərilməsi üçün yaradılmış şəraitlə tanış olublar.
