Qobustan rayonu, Dərəkənd kənd sakini, şəhid anası İbrahimova Səriyyə Sövkət qızı tərəfindən “Hürriyyət” qəzetinin redaksiyasına şikayət məktubu daxil olub. Şəhid anası acınacaqlı vəziyyətdə yaşadığını və bu günə kimi dövlət tərəfindən ona heç vaxt yardım olunmadığını bildirir:

“Mən, İbrahimova Səriyyə Sövkət qızı, bir şəhid anası kimi sizdən problemimi işıqlandırmağınızı xahiş edirəm.

3 ildir nəvəmə bildirirlər ki, evinizi tikəcəyik, amma heç bir iş görmürlər. Yaşadığım ev acınacaqlı vəziyyətdədir. Nəvəmlə birgə yaşayıram. Nəvəm də Aprel döyüşlərinin və 2-ci Qarabağ döyüşlərinin iştirakçısı olub.

Oğlum İbrahimov İqbal 1994-cü ildə Ağdamın Sənli kəndində şəhid olub.

Evimizin ucma səbəbi istismar vaxtının keçməsidir. Ev 1961-ci ildə tikilib. Qobustan rayonunda kimin adamı varsa, onlara növbəsiz ev verilir. Əsl ehtiyacı olanlar qalıb qıraqda, kimin imkanı var, onlara ev verilib. Rəsmi qurumlar bu dediklərimi araşdırsalar, həqiqəti görərlər. Xəstə adamam, rahat yaşamaq mənim də haqqımdır. Həyətimdə olan böyük gövdəli ağacları kəsib gediblər ki, gəlib ev tikəcəklər. Gələn, maraqlanan yoxdur”.

Məsələ ilə bağlı Qobustan Rayon İcra Hakimiyyəti ilə əlaqə saxlamağa çalışsaq da, zənglərimiz cavabsız qaldı.