“AzerGold” QSC-nin yeni istiqrazlarının ilk rüblük faiz ödənişi həyata keçirilib.

“Zirvə yolu”nun “AzerGold”a istinadən verdiyi məlumata görə, ümumilikdə 300 min ABŞ dolları həcmində vəsait istiqraz sahibləri arasında bölüşdürülüb.

Qeyd edək ki, ölkəmizin qiymətli kağızlar bazarının inkişafına, vətəndaşlara mənfəətli və etibarlı investisiya imkanı yaratmağa xidmət edən “AzerGold” istiqrazlarının nominal dəyəri 100 ABŞ dolları, tədavül müddəti 3 il, ümumi dəyəri 20 milyon ABŞ dollarıdır. Yeni istiqrazlar illik 6% kupon dərəcəsi ilə emissiya edilib.

Xatırladaq ki, “AzerGold” QSC tərəfindən istiqrazlar ilk dəfə 2020-ci ildə Bakı Fond Birjasında hərrac üsulu ilə kütləvi ticarətə buraxılıb. “PAŞA Kapital İnvestisiya Şirkəti” QSC-nin anderrayter qismində çıxış etdiyi “AzerGold” istiqrazları 3 illik tədavül müddəti ərzində investorlara 2 milyon 400 min ABŞ dolları məbləğində faiz gəlirləri qazandırıb.