Xəbər verdiyimiz kimi, iyunun 5-də “Təzadlar” qəzeti redaksiyasında olan bir qrup sakin “Kristal Bakı” ASC rəhbərli ilə aralarında yaşanan problemlərini dilə gətirərək, konkret faktları, foto və videoşəkilləri, eləcə də, Azərbaycan Respublikasının Prezidenti cənab İLHAM ƏLİYEVƏ, surəti Azərbaycan Respublikasının Birinci vitse-prezidenti Mehriban xanım Əliyevaya, Azərbaycan Prezidentinin köməkçisi və Prezident Administrasiyasının Hüquq mühafizə orqanları ilə iş şöbəsinin müdiri Fuad Ələsgərova, Azərbaycanın daxili işlər naziri Vilayət Eyvazova, Azərbaycanın Baş Prokuroru Kamran Əliyevə, Bakı şəhər prokuroru Elşən Abbasova, Yasamal rayon prokuroru Elman Süleymanova rəsmi müraciətlərini imzalayaraq “Təzadlar” qəzeti redaksiyasına təqdim ediblər.
Bakının Yasamal rayonundakı “Qanlı göl”ün qərb sahilində yaşayan sakinlərin Prezident cənab İLHAM ƏLİYEVƏ ünvanladığı müraciəti təqdim edirik:
“Hörmətli cənab Prezident!
Bildirmək istəyirik ki, bizim haqlı şikayətimizə, müraciətlərimizə, mülkiyyətimizin dağıdılmasına, öz evimizdə yaşamaq hüquqlarımızın məhdudlaşdırılmasına heç bir müvafiq dövlət orqanı, məmur reaksiya vermədiyinə, problemimizi həll etmədiyinə və “KRİSTAL BAKI” ASC adlı tikinti şirkətinin törətdiyi cinayət xarakterli əməllərinin qarşısı alınmadığına görə Sizə müraciət etmək məcburiyyətində qaldıq.
Belə ki, bizim Bakının Yasamal rayonundakı “Qanlı göl”ün qərb sahilində şəxsi vəsaitimiz hesabına tikdiyimiz müxtəlif ölçülü fərdi yaşayış evlərimiz var. Uzun illərdir ki, ailə üzvlərimizlə birlikdə həmin fərdi yaşayış evlərində yaşayırdıq. Lakin son bir ildir “KRİSTAL BAKI” ASC-nin əməkdaşları bizim həmin evlərimizdə yaşamaq hüququmuzu məhdudlaşdırıblar. Belə ki, “KRİSTAL BAKI” ASC-nin əməkdaşları dəfələrlə qəsdən fərdi yaşayış evlərimizə gedən avtomobil və piyada yolunu qazıb dağıdaraq yararsız hala salıb, hətta həmin yollarda qanunsuz olaraq post-buraxılış məntəqəsi quraşdıraraq evlərimizə nəqliyyat vasitələrinin giriş-çıxışına maneçilik törədirlər. Eyni zamanda, “KRİSTAL BAKI” ASC tərəfindən evlərimizə gedən qaz və su xətləri yararsız hala salındığından su və qaz təchizatı dayandırılıb. Bu yolla “KRİSTAL BAKI” ASC-nin rəhbərliyi bizi həmin fərdi yaşayış evlərimizi tərk etməyə məcbur edirlər.
Biz evlərimizdə yaşamaq üçün şəraitin olmaması səbəbindən kirayə evlərdə yaşamağa məcbur olmuşuq. “KRİSTAL BAKI” ASC-nin əməkdaşları isə sahibsiz həyətlərə qanunsuz daxil olaraq evlərimizi və yardımçı tikililəri söküb dağıdırlar. Sonuncu dəfə isə 28 fevral 2024-cü il tarixdə, saat 11:00 radələrində “KRİSTAL BAKI” ASC-nin xeyli sayda “qoçuları” tərəfindən Vəliyev Bəxtiyar Surxay oğluna məxsus sözügedən ərazidəki 42 ünvanda yerləşən fərdi yaşayış evini ağır texnika ilə söküblər. Hal-hazırda da “KRİSTAL BAKI” ASC-nin əməkdaşları hüquqa zidd hərəkətlərini davam etdirirlər. “KRİSTAL BAKI” ASC-nin rəhbərliyi bu yolla bizim fərdi yaşayış evlərimizi dəyərindən dəfələrlə ucuz qiymətə onlara satmağa məcbur edir. Biz dəfələrlə “KRİSTAL BAKI” ASC-nin rəhbərliyinə iradımızı bildirərək hüquqa zidd hərəkətlərini dayandırmalarını tələb etsək də, heç bir tədbir görülməyib, əksinə, bizi şərlədib tutduracaqları ilə hədə-qorxu gələrək fərdi yaşayış evlərimizi sökəcəklərini bildiriblər.
“KRİSTAL BAKI” ASC-nin əməkdaşlarının hüquqa zidd hərəkətləri ilə bağlı dəfələrlə Azərbaycan Respublikasının Daxili İşlər Nazirliyinə, Azərbaycan Respublikasının Baş Prokurorluğuna, Bakı şəhər prokurorluğuna, Yasamal rayon prokurorluğuna və digər aidiyyəti orqanlara şikayət ərizələri ilə müraciət etsək də, heç bir müsbət nəticəsi olmayıb. Müraciətimiz üzrə Yasamal rayon prokurorluğunda araşdırma aparılsa da, “KRİSTAL BAKI” ASC-nin vəzifəli şəxslərinin törətdikləri bu cinayətlərə hüquqi qiymət verilməyib, şikayətlərimizə laqeyidlik göstərilib. Belə ki, Yasamal rayon prokurorluğuna etdiyimiz müraciət cinayət xarakterli olmaqla “KRİSTAL BAKI” ASC-nin vəzifəli şəxslərinin əməllərində Azərbaycan Respublikası CM-nin 186.2.1, 308.1-ci və digər maddələrinin tərkibi olmasına baxmayaraq, bu günə kimi cinayət işinin başlanması təmin edilməyib, “KRİSTAL BAKI” ASC tərəfindən qanunsuz olaraq sökülmüş fərdi yaşayış evlərinin sahiblərinə dəymiş maddi ziyanın ödənilməsi təmin edilməyib.
Yasamal rayon prokurorluğundan “KRİSTAL BAKI” ASC tərəfindən fərdi yaşayış evinin sökülməsi ilə bağlı araşdırma aparılaraq müvafiq qərar qəbul edilməməsi səbəbini soruşduqda bizə Azərbaycan Respublikasının Baş Prokurorluğu tərəfindən müraciətimiz üzrə araşdırma aparılmasına icazə verilmədiyini bildirdilər. “KRİSTAL BAKI” ASC-nin rəhbərliyi Bakı şəhər İcra Hakimiyyəti Başçısının 23 dekabr 2021-ci il tarixli, 340 saylı sərəncamına əsasən həmin fərdi yaşayış evlərimizin yerləşdiyi torpaq sahəsinin yeni yaşayış kompleksinin tikintisi məqsədilə icarə əsasında istifadəsinə verilməsindən sui-istifadə edirlər. Qeyd edək ki, Bakı şəhər İcra Hakimiyyəti Başçısının bizim mülkiyyətimizdə olan torpaq sahəsini qanunla müəyyən edilmiş qaydada geri alınmadan həmin torpaq sahəsinin digər şəxslərə icarəyə verilməsi ilə bağlı səlahiyyətə malik olmayıb. Bakı şəhər İcra Hakimiyyəti Başçısının bizə məxsus torpaq sahəsini üçüncü şəxsə icarəyə verməsi barədə inzibati AKT tərtib etməsi, “İnzibati icraat haqqında” Qanunun 65.1.2-ci maddəsinə görə, müvafiq səlahiyyəti olmayan inzibati orqan tərəfindən qəbul edilmiş inzibati AKT kimi etibarsız sayılır. Bakı şəhər İcra Hakimiyyəti Başçısının 23 dekabr 2021-ci il tarixli, 340 saylı sərəncamı etibarsız sayılsa belə, həmin sərəncamda Bakı şəhəri,Yasamal rayonu, Xarici dairəvi avtomobil yolunun kənarında (“Qanlı göl”ün şimal-qərb hissəsi) yerləşən 25,31 ha torpaq sahəsi ərazidə qeydə alınmış daşınmaz əmlakların istifadəçiləri (mülkiyyətçiləri) ilə mülki münasibətlərin müvafiq qanunvericiliyinin tələblərinə uyğun qarşılıqlı razılıq əsasında “KRİSTAL BAKI” ASC tərəfindən tənzimlənməsi şərti ilə yeni yaşayış kompleksinin tikintisi məqsədilə “KRİSTAL BAKI” ASC-nin icarə əsasında istifadəsinə verilməsi göstərilib. Lakin “KRİSTAL BAKI” ASC-nin rəhbərliyi sərəncamda nəzərdə tutulan şərtlərə əməl etmir, fərdi yaşayış evlərinin sahibləri ilə evlərinin alınması ilə bağlı heç bir razılaşma olmadan, qanunsuz olaraq bizləri şəxsi mülkiyyətimizdən məhrum etməyə çalışır.
Azərbaycan Respublikasının Konstitusiyasında və eyni zamanda Azərbaycan Respublikasının tərəfdar çıxdığı “İnsan hüquqları və əsas azadlıqların müdafiəsi haqqında” Avropa Konvensiyasının 1 saylı protokolun 1-ci maddəsinə əsasən, hər bir fiziki və hüquqi şəxs öz mülkiyyətindən maneəsiz istifadə hüququna malikdir. Heç kəs cəmiyyətin maraqları və qanunda, beynəlxalq hüququn ümumi prinsiplərində nəzərdə tutulan hallardan başqa əmlakından məhrum edilə bilməz.
Azərbaycan Respublikasında mülkiyyət toxunulmazdır və dövlət tərəfindən müdafiə olunur. Heç kəs məhkəmənin qərarı olmadan mülkiyyətindən məhrum edilə bilməz.
Hörmətli cənab Prezident!
Odur ki, “KRİSTAL BAKI” ASC-nin əməkdaşlarının barələrində əmlakı qəsdən məhv etmə, vəzifə səlahiyyətlərini aşma, özbaşınalıq və digər maddələrlə cinayət işinin başlanması, həmin şəxslərin məsuliyyətə cəlb edilərək bizlərə vurulmuş maddi ziyanın ödənilməsinə və hüquqa zidd hərəkətlərinin dayandırılmasına köməklik göstərməyinizi Sizdən xahiş edirik.
Əvvəlcədən Sizə öz dərin minnətdarlığımızi bildiririk.
Müraciəti imzalayanlar:
Birinci Qarabağ Müharibəsi iştirakçısı Vəliyev Bəxtiyar Surxay oğlu; Vəliyev Elmidar Surxay oğlu; Məmmədov Yaşar Rəşid oğlu; Şirinov Nizami Eldar oğlu; Musayev Müşfiq Əfrasiyab oğlu; Qaraşov Səyyaf Kərəm oğlu; İmanov Müşfiq idris oğlu; Əliyev Emin Sabir oğlu; Zeynalov Etibar Səyfar oğlu; Səmədov Səməd Bürcəli oğlu; İmanov Əhliman İdris oğlu; İmanov Ramil Mehman oğlu; Əhmədova Nərgiz Rafiq qızı; Məmmədova Sevinc Rafiq qızı; İmanov Mehman Sərdar oğlu; Quliyev Zaur İciristan oğlu; Hacıyev Fərhad Mehman oğlu və Qaraşov Sərhad Kərəm oğlu”.
Məsələ ilə bağlı qarşı tərəfin mövqeyini öyrənmək üçün “Kristal Bakı” ASC ilə telefon əlaqəsi saxladıq. Tikinti şirkətindən bildirdilər ki, məsələyə yalnız rəhbərlik münasibət bildirə bilər, direktor hazırda ofisdə yoxdur. Direktorun köməkçisi qeyd etdi ki, məsələ barədə rəhbərliyə məruzə edildikdən sonra sorğunuz tez bir zamanda cavablandırılacaq. Odur ki, qarşı tərəfin də mövqeyini öyrənib dərc etməyə çalışacağıq.
“Təzadlar”
