Azərbaycanda tikinti şirkətlərinə və yanacaq doldurma məntəqələrinə sahib olan “MSDIS HOLDING” MMC nizamnamə kapitalını kəskin azaldır.

İqtisadiyyat.az-ın xəbərinə görə, şirkətlər qrupunun İdarə Heyətinin yığıncağında bununla bağlı qərar verib.

Qərara əsasən, cəmiyyətin nizamnamə kapitalı hər səhmin nominal dəyərinin azaldılması yolu ilə 2 572 000 (iki milyon beş yüz yetmiş iki min) manatdan azaldılaraq 500 manat olub.

Qeyd edilib ki, kreditorların yazılı tələbləri bir ay müddətində MMC-nin yerləşdiyi ünvanda qəbul olunur.

Xatırladaq ki, “MSDIS Holding” inşaat, istehsalat və yanacaqdoldurma sektorları üzrə fəaliyyət göstərir. Holding “MS Sement” sement istehsal müəssisəsinə, “MS Kabel” kabel istehsalı müəssisəsinə, “MS Asfalt” asfalt istehsalı müəssisəsinə, daş və qum-çınqıl yatağı ilə məşğul olan “MS Karyer” müəssisəsinə, “MS Laminat”şirkətinə və “MS Oil” yanacaq doldurma məntəqələrinə sahibdir.

Dia-az.İnfo əlavə edir ki, son günlər sözügedən şirkətə aid YDM-lər digər satış şirkətləri tərəfindən satın alınmaqdadır ki, bu da rəsmi çöküş fazası anlamını daşıyır.