Bu gün 4 avqust Fəttah Heydərovun anım günüdür.
Fəttah Səməd oğlu Heydərov 1938-ci il fevralın 23-də Naxçıvan MR-nın Babək rayonunun Çeşməbasar kəndində anadan olmuşdur. 1955-ci ildə Nehrəm kənd orta məktəbini, 1959–1964-cü illərdə Azərbaycan Dövlət Universitetinin mexanika-riyaziyyat fakültəsini, 1975-ci ildə Bakı Ali Partiya Məktəbini bitirmişdir.
Əmək fəaliyyətinə 1955-ci ildə Babək rayonu Güznüt kənd klubunun müdiri kimi başlamışdır. 1958-ci ildən Çeşməbasar səkizillik məktəbinin müəllimi, 1968-ci ildən Naxçıvan Vilayət Partiya Komitəsinin təlimatçısı, 1970-ci ildən Ordubad Rayon Partiya Komitəsinin ikinci katibi işləmiş, 1970–1990-cı illərdə Naxçıvan şəhər və Ordubad rayon XDS-in deputatı seçilmişdir.
1976–1978-ci illərdə Naxçıvan MSSR Əhaliyə Məişət Xidməti naziri işləmişdir.
1978-ci ildən Ordubad, 1986-cı ildən Culfa Rayon Partiya Komitəsinin I katibi, 1983-cü ildən Naxçıvan MR Mədəniyyət naziri işləmişdir.
1990–1995-ci illərdə Naxçıvan MR Ali Sovetinin deputatı olmuşdur. Azərbaycan Respublikası I (1995-ci il), II (2000-ci il), III (2005-ci il), IV (2010-cu il), V (2015-ci il), VI (2020-ci il) çağırış Milli Məclisinin deputatı olmuşdur. Milli Məclisin Hesablayıcı Komissiyasının sədri, Regional Məsələlər Komitəsinin sədr müavini olmuş Azərbaycan Ağsaqqallar Şurasının sədri işləmişdir.
O, 4 avqust 2020-ci ildə vəfat etmiş, I Fəxri Xiyabanda dəfn olunmuşdur.
Fəttah Heydərov Vətəninə, xalqına göstərdiyi əvəzsiz xidmətlərlə, eyni zamanda hədsiz məhəbbəti ilə seçilən şəxsiyyətlərdən biri idi. Çünki Fəttah müəllim yaşadığı müddətdə o qədər mərhəmətli, xalqa, dövlətə, dövlətçiliyə layiq və sadiq şəxsiyyət olub ki, bu günkü gündə də xalqın ürəyində özü üçün böyütdüyü həmin o sevgidir ki, ölümündən sonra da o, hörmətlə xatırlanır, yad edilir. Və bu gün 4 avqust Fəttah Heydərovun anım günüdür. Biz də Fəttah müəllimi dərin hörmət və ehtiram hissi ilə anırıq! Allahdan ona rəhmət diləyirik!
Zirveyolu.info
