Ruzgar Baratzadə ölümü əbədi bir yuxu deyil, ölümsüzlüyün başlanğıcıdır.
Ölüm sevinməsin qoy
Ömrünü vermir bada
Ömrünü bada vermədi Ruzgar müəllim. Hədər olmayan ömrün hər səhifəsini dəyərləndirdi. Ömür kitabından hər açılan vərəq tələbə, mütəxəssis yetişdirdi.
Sevərək yaşayanlar
Sevilərək ölənlər
Sevərək yaşadı, bəli. Sevilərək də öldü. Əslində, ölmədi əbədiyyətə qovuşdu, yaddaşlara hopdu, xatirələrə həkk oldu, əlinin istiliyi, biliyi, zəkası kitablara möhürləndi.
Sevdi-həyatı sevdi, yaşamağı sevdi, peşəsini- müəllimliyi sevdi, tələbələrini sevdi.
Düsturlar, dioqramlar həyat planına, yaşamaq qayəsinə çevrildi. Riyaziyyatla yaşadı, nəfəs aldı.
Baratzadə Ruzgar Zülfiqar oğlu 1950-ci ildə qədim mədəniyyət diyarımız Gəncədə dünyaya göz açdı. Taleyini də doğulduğu şəhərə bağladı. Orta təhsilini, ali təhsilini Gəncə şəhərində aldı. 1972-ci ildə GDU-nun Riyaziyyat fakültəsini bitirdi. 1992-ci ildə “Elastik-plastik konstruksiya elementlərinin mürəkkəb yüklənmədə dayanıqlıq məsələsi” mövzusunda namizədlik dissertasiyasını müdafiə etdi.
1977-ci ildən ADAU-nun Ali riyaziyyat kafedrasında assistent
1989-1992-ci illərdə ADAU-nun Ali riyaziyyat kafedrasında baş müəllim
1992-2001- ci illərdə ADAU-nun Ali riyaziyyat kafedrasında dosent əvəzi
2001-2009-cu illərdə ADAU-nun Ali riyaziyyat kafedrasının müdiri
2018-ci ildə Fizika və riyaziyyat kafedrasında dosent vəzifəsində çalışmışdır.
Azərbaycan Respublikası Kənd Təsərrüfatı Nazirliyi
Azərbaycan Dövlət Aqrar Universiteti
Elmi Şuranın 17 sentyabr tarixli iclasının (protokol ES N01/5.5) qərarı ilə
Baratzadə Ruzgar Zülfiqar oğluna Fizika və riyaziyyat elmləri üzrə Professor dərəcəsi verilmişdir.
35 elmi əsərin, o cümlədən, 2 dərs vəsaiti , 16 elmi məqalə, 16 proqram, 2 metodik vəsaitin müəllifi olmuş, beynəlxalq seminar, simpozium və konfranslarda canından çox sevdiyi ölkəsini, canıyla, ruhuyla bağlı olduğu doğma şəhərini təmsil etmişdir.
72 il ömrə bu qədər nailiyyət, məsuliyyət, uğur sığdırmaq hər adama nəsib olmur. Ruzgar müəllim cəmi 72 il yaşasa da, elə də uzun olmayan ömrünə böyük əmək, əzm sığdırdı. Gecələri yazı masasının üstündə mürgüləyib, günə kitablarla , tələbələrlə başladı. ölməzlik qazandı, həmişəyaşar oldu.
“Həyat beşiklə məzar arasındakı sınaq müddətidir”.
Elmi imtahanlar kimi həyat imtahanından da uğurla çıxdı Baratzadə Ruzgar. Qohum, dost, vətəndaş, yoldaş, Allahına bəndə, kimsəsizə dayaq, köməksizə kömək oldu. İçindəki ziyalı işığı təkcə öz evini deyil, elini işıqlandırdı, neçə-neçə gəncə mayak oldu, yol göstərdi. Auditoriyada müəllim, auditoriyadankənar dost, həmdəm oldu tələbələrinə. Hər gəncə özəl yanaşmaqla onları kəşf edib, düzgün istiqamətləndirib Azərbaycan elminə töhfələr verdi.
Müəllimlik kimi şərəfli peşəni məsuliyyətlə, həddən-ziyadə diqqət və əzmlə daşıdı. Müəllim adına layiq oldu. Sözün əsl mənasında müəllim oldu, ömrünün sonunacan yüksələn xətlə nüfuzunu qoruyub saxladı. Peşəsinə sədaqət müəllim nüfuzunun qiymətini artırır. Ruzgar müəllim son nəfəsinədək sadiq qaldı peşəsinə.
Gözünün nuru,beyninin ziyası, ürəyinin istisi ilə ömrünün sonuna kimi nəsil-nəsil tələbələr yetişdirdi.
Qədim yunan filosofu Sokrat deyib “Alimin biliyi o, təvazökar olanda üzə çıxır”. Ruzgar müəllim məhz belə bir ömür yaşayıb. Yersiz tərifdən həmişə qaçıb.
“Qocaman palıdın sonrakı ömrünü onun dibindən çıxan pöhrələr yaşadır”.
Bacarıqlı elm təşkilatçısı, yorulmayan tədqiqatçı, unudulmayan müəllim, əsl ziyalı idi Baratzadə Ruzgar.
Özündən sonrakı nəsil üçün böyük nəzəri irs, tədqiqatçılıq səriştəsi, silinməz izlər qoyan Ruzgar müəllim cild-cild sanballı tədqiqat əsərləri ilə riyaziyyat elmində özünə əbədi heykəl ucaltmışdır. Riyaziyyat elminin dünəni, bugünü və sabahı ilə maraqlanan hər kəs Ruzgar müəllimi minnətdarlıqla xatırlayacaq.
Ruzgar Baratzadə ölümü əbədi bir yuxu deyil, ölümsüzlüyünün başlanğıcıdır.
Baratzadə Ruzgar müəllim heç vaxt ölməyəcək, o, daim qəlblərdə, düşünən beyinlərdə, riyazi təfəkkürlərdə, auditoriyalarda, riyaziyyat elminin nəzəriyyələrində yaşayacaq.
Fevralın 1-i Ruzgar müəllimin əbədi həyata qovuşmasından, ölümsüzlüyünün başlanğıcından iki il ötür. Yeriniz behişt, torpağınız pərqu olsun, Ruzgar müəllim.
Elida Laçın
