Azərbaycan Milli Elmlər Akademiyasının keçmiş prezidenti Ramiz Mehdiyevin kürəkəni, sabiq deputat İlham Əliyevə məxsus “Dostluq-MK” MMC ətrafında qalmaqal yaranıb.

Qaynarinfo xəbər verir ki, qalmaqalda tərəflərdən biri xaçmazlı iş adamı Mənsur İbrahimovdur.

Bir neçə gündür bu barədə mediada yazılır. Məlum olur ki, şirkət keçmiş deputat İlham Əliyevdən əvvəl Mənsur İbrahimovla Cavid Balaqadaşov adlı şəxsə məxsus olub. Cavid Balaqadaşov hakim Yeni Azərbaycan Partiyasının (YAP) Xaçmaz təşkilat sədri Məhəmməd Balaqadaşovun oğludur.

Keçmiş deputat şirkəti bu şəxslərdən alıb. Mənsur İbrahimovun sözlərindən aydın olur ki, Ramiz Mehdiyevin kürəkəni ilə 3 milyonluq sövdələşmə olub. Lakin İlham Əliyev rəsmiyyətdə bu məbləğin çox az göstərilməsini istəyib. O, bunu deputat olması ilə izah edib.

Alqı-satqı bitəndən sonra isə keçmiş deputat 3 milyonu ödəməyib. Mənsur İbrahimov məhkəməyə müraciət edib. Lakin bütün məhkəmə instansiyalarından məğlub ayrılıb. O, məsələ ilə bağlı Məhkəmə-Hüquq Şurasına müraciət edib.

Əldə etdiyimiz yeni məlumatlara görə, Mənsur İbrahimov bununla kifayətlənmək istəmir. Sahibkar yenidən hüquqi müstəvidə mübarizəsini davam etdirməkdə israrlıdır.

Onun növbəti məhkəmə iddiası “Dostluq-MK” ilə bağlı çəkişmədə İlham Əliyevin şirkəti almasından danışarkən “Bir qəpik də pul verməmişəm” fikrinin videogörüntüsünün üzə çıxarılması ilə bağlıdır.

Mənsur İbrahimov hesab edir ki, bu fakt keçmiş deputatın haqsız olduğuna dair tutarlı sübutdur. Yəni, Ramiz Mehdiyevin kürəkəni etiraf edib ki, o şirkətin müqabilində heç bir məbləğ ödəməyib.

Lakin hansısa səbəbdən Bakı Kommersiya Məhkəməsində edilən bu etirafla bağlı videogörüntü üzə çıxarılmır.

Mənsur İbrahimov növbəti iddiasında məhz bu videogörüntünün üzə çıxarılmasını tələb edəcək. Bu halda iş İlham Əliyevin əleyhinə çevrilə və o vəd etdiyi 3 milyonu ödəmək məcburiyyətində qala, yaxud da şirkəti itirə bilər.