Deyəsən, Zaur Mikayılovun səlahiyyətləri artırıldıqca, “narazı vətəndaşlar auditoriyası” daha da genişlənir.

“DogruXeber.az” redaksiyasına etibarlı mənbədən verilən məlumata görə, “Azərsu” ASC işçilərinin əvvəllər hər ayın 1, yaxud 2-də əmək haqları ödənildiyi halda, agentliyin tabeliyinə verildiyindən bəri əmək haqqlarının ödənilməsində ləngimələr yaranmağa başlayıb.

Hətta, ötən gün Azərsu çalışanlarından bir neçəsi redaksiyamızın əməkdaşına artıq, ayın 8-i olmasına baxmayaraq, hələ də maaşlarının ödənilmədiyindən gileyləniblər.

Qeyd edək ki, 2023-çü ilin 30 mart tarixindn etibarən “Azərsu” ASC yeni yaradılmış “Dövlət Su Ehtiyatları Agentliyinin tabeliyinə verilib, rəhbəri də keçmiş “Melorasiya və Su Təsərrüfatı” ASC-nin rəhbəri Zaur Mikayılovdur.

O, Zaur Mikayılov ki, vəzifəyə gəldiyindən bəri rəhbərlik etdiyi dövlət qurumunu aidiyyatı olmasa da demək olar ki, tam öz ixtisasına (biznesin idarə olunması) uyğun şəkildə idarə edir.

“DogruXeber.az” informasiya agentliyi olaraq, dəfələrlə İstər Zərdab, istər Kürdəmir, istər Şəmkir, istər Ağdam, istər Sabirabad, istərsə də digər bir neçə rayonların Suvarma Sistemləri İdarələrində həyata keçirilən qanunsuz işlər, yeyinti, korrupsiya, dövlət əmlakına və büdcəsinə şəxsi maraqlara görə qəsdən ziyan vurma və vətəndaşların bu qurumdan narazılıqları barəsində məlumatlar, videogörüntülər yayımlamışıq. Amma, bu qədər narazılıqlara rəğmən, Zaur Mikayılov səlahiyyətlərinin daha artırılması ilə “mükafatlandırıldı”.

Baxmayaraq ki, “Melorasiya və Su Təsərrüfatı” ASC Zaur Mikayılovun rəhbərliyi altında özünü ayrıca qurum olaraq doğrultmadı, üstəlik “Azərsu” ASC də onun tabeliyinə verildi.

Etibarlı mənbənin redaksiyamıza bildirdiyinə görə, bir çox sahələrdə olduğu kimi, Su Ehtiyatları Agentliyinin də yaxın vaxtlarda regionallaşdırılacağı gözlənilir. Belə olan halda bu sahədə böyük ixtisarların olacağı da qaçılmazdır. İxtisarların olması isə ölkədə onsuz çox olan işsizlərin sayının daha da artması deməkdir.

Bundan əlavə, bildirilir ki, əvvəllər Azərsu əməkdaşlarının işinə görə müəyyən edilmiş dərəcələr mövcud idi ki, hər kəsin o, dərəcəyə görə əmək haqqına əlavələr olunurdu. Yaxın günlərdə o, dərəcələrin də ləğv olunacağı, birmənalı olaraq, səlahiyyətləri biraz üstün olan və yüksək maaş alan işçilərin maaşının 600 (altı yüz) manata, digər işçilərin isə maaşının minimuma (345 AZN) endiriləcəyi deyilir.

Qarşımızda olan Əhliman Kərimov, Tahir Xəlilov, Hafiz Əzimzadə, Etibar Nəbiyev və digər bu kimi nümunələr onların bu dəyişikliklərdən heç də təsirlənməyəcəyini göstərsə də, Ağdam rayon sakini İxtiyar Rüstəmov kimi sadə çalışanların yarısının dəyişikliyin birinci (ixtisar) tərəfindən, yarısının isə ikinci (əmək haqqının minimuma endirilməsi) tərəfindən “nəsiblərini alacaqları” qaçılmazdır. Hər halda bugünə qədərki, eləcə də bugünkü reallıqlar belə deməyə əsas verir.

Qurumun Abşeron rayonunun “Qurd dərəsi” adlanan ərazisində, həmçinin bölgələrdə olduğu kimi dövlətin suyunu insanlara müəyyən ödənişlər, daha doğrusu rüşvət qarşılığında vəd edən, çox zaman da “Qurd dərəsi”ndə olduğu kimi verdikləri vədi doğrultmayan səlahiyyətli əməkdaşlarının barələrində şikayətlər artdıqca, cəzalandırılmaları yerinə, sadəcə yerləri dəyişdirilir, o, da hərdənbir. Amma, dəyişən yalnız bu şəxslərin altındakı kürsü olur, fəaliyyət elə olduğu kimi davam edir.

Beləliklə, Zaur Mikayılovun rəhbərliyi altında ölkənin dörd bir tərəfində böyük “narazı vətəndaş ordusu yetişdirilir”.

Əlbəttə ki, iqtisadi böhranın, bahalaşmanın və işsizliyin hökm sürdüyü bir vaxtda sözügedən qurumda aparılması gözlənilən ixtisarlar, həmçinin maaşların azaldılması xalqa vurulacaq “ən ağır zərbə” olacaq.

Adətən, hər hansı bir yeni qurum yaradıldıqda, yaxud hər hansı bir qurumun fəaliyyətinin daha da genişləndirilməsi “daha çox iş yeri” demək hesab olunsa da, bu qurumun qarşıda gözlənilən dəyişikliyi bunun tam əksini deyir.

Bəs bu dəyişiklikləri etməkdə Zaur Mikayılovun məqsədi nədir?

Sahil Babayev kimi xalqın cibini soyaraq, dilənçi vəziyyətinə salaraq büdcəyə qənaət etmək, yoxsa “öz biznesinin” fəaliyyət dairəsini genişləndirməklə, yerlərdəki “filialları”nın müxtəlif yollarla binəva camaatdan topladıqları “xəraclar”ın əldən-ələ keçməklə azalmasının qarşısını almaq ?…

Əslində, bu dəyişiklik əgər aparılarsa yuxarıda qeyd etdiyimiz sualın ikinci tərəfi üçün daha sərfəli variant olacağı real görünür.

Mövzunu diqqətdə saxlayacağıq.

Qeyd: Növbəti yazımızda, içməli su tapmaqda çətinlik çəkdiklərindən redaksiyamıza şikayətlənən Balakən rayon Katex kənd sakini Süleymanov Anar Ömər oğlunun müraciətini ətraflı şəkildə təqdim edəcəyik.

Redaksiyamız hər kəsin söz haqqını tanıyır.

DogruXeber.az