“Xətai rayonu, Gəncə prospekti, 58b ünvanındakı mənzil kompleksini qanunsuz idarə edən “Xətai Park Servis” MMC bu gün məhkəməyə əcaib protokol gətirmişdi. Guya sakinlərin ümumi yığıncağının protokolunu…” “Dia.az” xəbər verir ki, bunu öz açıqlamasında tanınmış hüquqşünas Əkrəm Həsənov qeyd edib.
Ekspert daha sonra bunları əlavə edib: “Kompleksdə 1500-dən çox mənzil var, bu isə cəmi 9 nəfərin imzası ilə protokol gətirib ki, ay məhkəmə, biz binanı qanuni olaraq ümumi yığıncağın bu qərarı əsasında idarə edirik. Əlavə olaraq təxmini 400 nəfərin də imzalı sənədini gətiriblər ki, sakinlər bizdən razıdır və guya ki, bu imzalar da ümumi yığıncaqda çoxluğun iştirakını təsdiq edir (halbuki, 750-dən də xeyli çox imza lazımdır). Nümayəndəsindən soruşdum ki, bu ümumi yığıncağı harada keçirmisiz əyani şəkildə? Cavab verdi ki, “harada lazımdırsa, orada da keçirmişik”. Bu anda protokolun tarixinə (1 may 2020-ci il) fikir verərək, özümü gülməkdən zorla saxlayaraq dedim ki, keçirə bilməzdiniz axı o dövrdəki karantin qaydalarına əsasən. Şahmatda buna “kooperativ mat” deyirlər. Yəni tikinti şirkəti ona mat qoymağıma özü yardım etdi!.. Ümumi nəticə isə budur: tikinti şirkətləri o qədər harınlayıb ki, heç sənədləri də əməlli-başlı saxtalaşdıra bilmirlər…”(Dia.az)