İmişlinin həbs olunan keçmiş icra başçısı Vilyam Hacıyevin evindən və xidməti otağından külli miqdarda ayrı-ayrı valyutalarda pul vəsaitlərinin aşkarlanması cəmiyyətdə müzakirələrə səbəb olub.
Dövlət Təhlükəsizliyi Xidməti (DTX) tərəfindən mayın 5-də Vilyam Hacıyevin xidməti və yaşadığı ünvanlarda əməliyyat-istintaq tədbirləri həyata keçirilib. Müvafiq ünvanlara baxış zamanı Vilyam Hacıyevin rayon İcra Hakimiyyətinin baş mühasibi Cəmil Musayev və başqaları vasitəsi ilə qəbul etdiyi pul vəsaitlərinin məbləğlərinə dair müxtəlif qeydlər aşkarlanıb. Habelə, ayrı-ayrı valyutalarda xüsusi qaydada qablaşdırılaraq saxlanılan pul vəsaitləri, iş üzrə əhəmiyyət kəsb edən digər sənədlər və maddi sübutlar aşkar edilərək götürülüb.
Onun yaşadığı evə baxış zamanı qarajdan 10-PR-777 dövlət nömrə nişanlı “Bentley” və 90-KH-900 dövlət nömrə nişanlı “Range Rover” markalı avtomobillər aşkar edilib. Bir məmurun qanuni yollarla bu qədər sərvətə sahib olması təbii ki, mümkün deyil. Maraqlıdır ki, Vilyam Hacıyev aylıq vəzifə maaşının hamısını yığsa belə, bu qədər var-dövlətə sahiblənə bilməzdi.
Şəhər, rayon və şəhər rayonu üzrə icra başçılarının maaşı əhali sayına uyğun olaraq müəyyənləşir. Belə ki, əgər icra başçısı əhalisi 100 min nəfərdən çox olan əraziyə rəhbərlik edirsə, onun maaşı 1045 manatdır. Əhalisi 50 – 100 min nəfər olan ərazinin icra başçısı isə 990 manat maaş alır. Əhalisi 50 min nəfərdən az olan ərazilərin icra başçıları isə daha az əməkhaqqı alırlar. Onların məvacibi 880 manatdır. İmişlinin əhalisi 126 min nəfərə yaxındır. Deməli, Vilyam Hacıyevin aylıq maaşı 1045 manat məbləğində olub.
Bildirək ki, cinayət işi üzrə Vilyam Hacıyev vəzifə səlahiyyətlərindən sui-istifadə etmə, mənimsəmə, təkrar rüşvət alma, vəzifə saxtakarlığı faktlarına görə, Cinayət Məcəlləsinin müvafiq maddələri ilə təqsirləndirilən şəxs qismində cəlb olunaraq, barəsində məhkəmənin qərarı ilə həbs-qətimkan tədbiri seçilib.
Qeyd edək ki, Vilyam Hacıyev Prezident İlham Əliyevin mayın 6-da imzaladığı sərəncamla vəzifəsindən azad olunub.
Aqşin Kərimov
