Məlumdur ki, 44 günlük Zəfər savaşından sonra bir çox generallarımız Prezident İlham Əliyev tərəfindən yüksək mükafatlarla təltif olundular. Ancaq general-leytenant Rövşən Əkbərovun və general-mayor Xəqani Cəbrayılovun bu siyahıda olmaması müəyyən suallar doğurdu. Sonradan isə iki generalın nəinki mükafat almaması, hətta ordu sıralarından uzaqlaşdırılması şok effekti yaratdı.
İki gün öncə general-leytenant, Milli Qəhrəman Rövşən Əkbərovun həbs olunması cəmiyyətdə yaranan bu suallara cavab verdi.
Bəlli oldu ki, cənab general hələ 19 il öncə Kiyev şəhərində azərbaycanlı iş adamını hərbi bıçaqla qətlə yetirib.
Bu azmış kimi general səlahiyyətlərindən istifadə edib özü üçün geniş biznes şəbəkəsi yaradıb.
Hazırda ikinci general Xəqani Cəbrayılovun başında qara buludlar dolaşır. Onun da mənəviyyatsız əməlləri, orduda qulluq edən xanımlara qarşı hərəkətləri, donuz fermaları, Beyləqanda, Şamaxıda qoyun sürüləri, ticarət obyektləri və daha nələri… Yəni, sözün qısası, general Xəqani Cəbrayılovun sayılı günləri qalıb. Yəqin ki, yaxın günlərdə onun da qələmi sındırılacaq.
Digər general Nəcməddin Sadıqovun həbs olunacağı hazırda medianın gündəmindədir.
Daha bir generalın istintaqa çağırılması, hətta həbs oluması etimalı da medianın gündəmində qeyd olunur.
Söhbət 19 il ( 1995 – 2013 ) Azərbaycan Respublikasının Müdafiə Naziri işləmiş Səfər Əbiyevdən gedir.
Bəli, Səfər Əbiyev kimi generallar Azərbaycan Ordusuna biznes mənbəyi kimi baxırdılar. Yəni ordumuza ayrılan 100 milyonlarla vəsaiti mənimsəyiblər, əsgərlərimizə verilən ərzaq məhsullarına da göz dikiblər.
Biz hələ Əbiyevin “donuza” olan sevgisindən danışmırıq.
Dəfələrlə Əbiyevə xəbərdarlıq edilib ki, Azərbaycan əsgərinin qida rasionunda donuz əti, donuz piyi yoxdur və olmaz. Əbiyev gülərək əlini yelləyib və deyib ki, donuzda yaxşı pul var.
Bəli, Səfər Əbiyev uzun müddət Azərbaycan ordusuna Ukraynadan xarab olmuş donuz əti, donuz yağı gətirib və milyonlar qazanıb.
Hazırda canlı şahidlər var ki, təsdiq edirlər ki, Səfər Əbiyevin Belorusiyadakı şəriklərinin vaqonla göndərdikləri kartofu heç mal-qaraya da verməzdilər. Şahidlər bildirir ki, vaqonun qapısını açanda üfunətdən baş çatlayırdı. Bunu Səfər Əbiyevə məruzə edəndə gülərək, heç nə olmaz deyirdi. Çünki Belorusiyanın iylənmiş kartofundan Əbiyev milyonlar qazanırdı.
Daha nələri deyək ?
Bəlkə “dağdan sürüşüb ölən əsgərlərdən “ danışaq, cənab Əbiyev ?
O əsgərlərin günahı nə idi ? Onlar dağdan sürüşmüşdü, yoxsa..?
Bütün bu suallara cavab verəcəksən, cənab Səfərbala.
Necə ki, 19 il sonra Rövşən Əkbərov cavab verir. //gundelik-baku.com//
