Hələ də “gözü çıxmış qardaşlarından”, yəni həbs olunan icra başçılarının aqibətindən dərs götürməyənlər var. Bu barədə DİA.AZ-a danışan mənbə hazırda Xətaiyə rəhbəırlik edən Rafiq Quliyevi belələrindən biri hesab edir. Halbuki ona ilk təyinatı vaxtından xalqın maraqlarına xidmət etməsi ən ali səviyyədə ŞƏRT KİMİ qoyulmuşdu.

Məlumatlı mənbənin DİA.AZ-a verdiyi informasiyaya görə bəzi kluarlarda özünü hakim ailənin yaxını kimi təqdim edən Rafiq Quliyev üçün insan amili nəinki birinci deyil, hətta yoxdur. Və zaman onu göstərdi ki, bu şəxs yalnız öz şəxsi büdcəsini düşünməklə Prezident iradəsinə qarşı çıxmır, eyni zamanda ölkə başçısının siyasi kursunu dünyada şübhə altına alan əməllərə də yol verir.

Mənbə bildirir: “Xətai rayon Cavanşir küçəsində yerləşən və hər kəsin “Rafiq Quliyevin avtoyuma məntəqəsi” kimi tanıdığı obyekt, illərdir ki, gecənin gec saatlarına qədər, bəzən isə 24 saat belə fəaliyyət göstərir.

Rafiq Quliyevin kirvəsi İntiqam adlı şəxsin bacısı Afətin adına rəsmiləşdirilən bu obyektlə bağlı hələ ötən il vətəndaşların polisə və digər aidiyyatı dövlət qurumlarına etdikləri şikayətlər əsasında Bakı şəhər Baş Polis İdarəsi BŞİH-yə və Xətai RİH-yə obyektin təyinatının dəyişdirilməsi ilə əlaqədar rəsmi məktub göndərsə də, lakin həmin məktub naməlum səbəblərdən icra edilmədi. Əslində hər şey məlumdur. Özünü Xətainin padşahı kimi aparan Rafiq Quliyev nədən gəlirli obyektinn təyinatını dəyişdirməlidir?

“Mən salim olum, cümlə-cahan batsada, batsın” təfəkkürü ilə rayonu idarə edən bir şəxsə vətəndaş narahatlığı türklər demiş hələ ki, vız gəlir”.

Onu da bildirək ki, Xətainin icra başçısı postuna “Qarabağ Qazisi” kimi təyin olunduğu deyilsə də, Rafiq Quliyev vəzifədəki ilk günlərindən öz şəxsi maraqlarını rəhbər tutub. Mənbə bildirir: “Ona görədir ki, hazırda Xətai rayonunda camaatın etirazına səbəb olan şikayət materialları da mətbuatdan sirli şəkildə yoxa çıxır. Əvəzində isə Prezidentin gördüyü işlər, hansı işlər ki, Xətai rayonu ərazisindədir… Həmin işlər Rafiq Quliyevin adına çıxılırmış kimi biabırçı materiallar mətbuatda yer alır. Bununla Rafiq müəllim nə demək istəyir? Nəyə nail olmaq istəyir? Demək istəyir ki, Qənimətlər Parkı, 8 Noyabr prospekti, Polad Həşimov küçəsi və digər bu kimi işlər onun İRADƏSİNİN MƏHSULUDUR?”

Onu da bildirək ki, dia.az-a bununla bağlı ilginc iddiaların yer aldığı material da təqdim olunub. Həmin yazını yaxın vaxtlarda təqdim edəcəyik. Bizi izləməkdə davam edin. İddia olunanlarla bağlı bütün maraqlı tərəflərin mövqelərini işıqlandırmağa hazırıq…