Gürcüstan-Azərbaycan münasibətlərinın korlanmasına çalışan dairələrin hədəfləri Qara dəniz və Xəzər dənizi arasında yerləşən strateji regionda həyata keçirilən layihələrə qarşı çıxmaqdır.

Beynəlxalq münasibətlər  üzrə ekspert Yeganə Hacıyeva  Redaktor.az-a açıqlamasında bildirib ki, son aylar Azərbaycan və Gürcüstan arasında strateji münasibətlərin ruhuna tamamilə zidd olan və  iki ölkə arasında qarşıdurmaya yönəlmiş təxribatların artması təsadüf deyil:

“Baş verən təxribatlar strateji tərəfdaş dövlətlər -Azərbaycan və Gürcüstan rəsmilərinin təmkinli yanaşması ilə zərərsizləşdirildi. Lakin paralel olaraq hər iki ölkədə radikal müxalif və şübhəli siyasi qrupların Azərbaycan və Gürcüstan cəmiyyətinə yönəlik körükləyici kampaniyaları da artmağa başladı. Hər nə qədər təəccüblü olsa da, yerli və beynəlxalq  QHT-lərin təhrikçi aksiyaları, siyasi “şoumen”lərin pafoslu çağırışları və müxalifətin prosesdən ucuz siyasi divident götürməyə hesablanmış aksiyaları həyata keçirildi. Bütün bu aksiyalar bir növ artıq adət halını almış, sosial media üzərindən  şübhəli səhifələrdən insidentin  “sızdırılan” detalları üzərində qurulan  təbliğatla müşayiət olundu. Onsuz da Azərbaycanda həssas dövrlərdə bu siyasi və siyasiləşmiş QHT qruplarının sosial mediada  şübhəli səhifələrdən “sızdırılan” məlumatları tirajlamaqla təbliğat qurması ilk hal deyil. Bu “koalisiya”nın birgə fəaliyyətinin daha öncələr istər Gəncə terror hadisəsi, istər texnogen qəzalar, istər Hacı Muradın qəbrinin ekshumasiyası, istərsə də cəmiyyətin diqqətini çəkən digər həssas mövzularla bağlı hadisələr zamanı şahidi olmuşduq. Qonşu ölkədə isə həmin ərəfələrdə oxşar dairələrin eyni üsul və alətlərlə guya Azərbaycanın bu ölkədəki  enerji kapitalını  siyasi kapitala çevirmək planının mövcud olması ilə bağlı kampaniya başladı. Azərbaycan Dövlət Neft Şirkətinin Gürcüstandakı mövcud siyasətinin isə Gürcüstanı Azərbaycandan enerji asılılığına salmaq istiqamətində qurulması kimi təxribatçı təbliğat aparılmağa başladı. Münasibətlərin korlanmasına yönəlik cəhdlərdə  Gürcüstan cəmiyyəti və sosial mediası erməni seqmentinə göydəndüşmə bir şans verdi ki, Keşikçi Dağ mövzusu ətrafında Azərbaycana qarşı ikinci cəbhə yaratmağa cəhdlər oldu”.

Ekspert qeyd edib ki, artıq 2 aydır qonşu ölkədə davam edən siyasi proseslərə etnik azərbaycanlı Gürcüstan vətəndaşlarının cəlb olunması cəhdləri də var:

“Hansı ki, azərbaycanlı Gürcüstan vətəndaşları siyasi cəhətdən passiv elektoratdır və ancaq seçkidən seçkiyə aktivləşir. Hər iki ölkədə də dövlət rəsmiləri cəmiyyətlərinin təhrikçi və körükləyici məlumatlarla gərginləşən ab-havasının zərbələrini bir çox hallarda öz üzərlərinə çəkərək, təmkinli mövqeləri ilə bu münasibətləri  qorunmağa çalışırlar. Çünki Azərbaycan və Gürcüstan regional və regionlararası formatlarda enerji, nəqliyyat-tranzit sahələri üzrə qlobal layihələr həyata keçirir. Paralel olaraq, ikili formatda sənaye, kənd təsərrüfatı və turizm sahəsində əməkdaşlıq mövcuddur. Gürcüstana yatırılan investisiyaların həcminə görə Azərbaycan ən böyük xarici  investordur, tərəflərarası qarşlıqlı investisiya mühitinə görə Gürcüstan Azərbaycan iqtisadiyyatına 93,8 milyon  dollar, Azərbaycan isə Gürcüstana 3,2 milyad dollar investisiya yatırıb.

Azərbaycanda 300-dən çox Gürcüstan şirkəti, Gürcüstanda isə 1300-ə yaxın Azərbaycan  şirkəti, xüsusilə Azərbaycan Dövlət Neft Şirkəti- SOCAR  uğurla fəaliyyət göstərir.  SOCAR-ın törəmə şirkəti olan SOCAR Energy Georgia Gürcüstandakı neft satışının 72%, dizel satışının isə 61%-nə və  Kulevi neft terminalına nəzarət edir. Həmçinin SOCAR Energy Georgia Gürcüstanda neftin topdan və pərakəndə satışı, neft və neft məhsulları, mayeləşdirilmiş qazın ölkəyə idxalı, neft terminalı və anbarlarının tikintisi ilə məşğuldur”.

Y. Hacıyeva vurğulayıb ki, Gürcüstan və Azərbaycanın birgə həyata keçirdiyi layihələr Azərbaycanın geopolitik əhəmiyyətinin misilsiz dərəcədə artması ilə nəticələnib:

“Son illər qlobal səviyyədə lojistik mənzərə dəyişib. Belə ki, Qərb üçün Rusiya və Avropa arasında enerji və ticarətin quru ilə nəqli üçün mövcud olan üç yoldan yalnız biri cazibədardır. Rusiya və İranla bərbad münasibətləri fonunda Qərbin yüz milyardlarla dollarlıq ticarətinin yalnız bir real marşrutu- Azərbaycandan keçməklə Gürcüstan ərazisindən nəqli marşurutu əlverişlidir. Bir sözlə, Gürcüstan-Azərbaycan münasibətlərinin korlanmasına çalışan dairələr, onların hər iki ölkədə siyasi qruplar və sosial mediadakı uzantılarının uzaqmənzilli hədəfləri budur ki, Qara dəniz və Xəzər dənizi arasında yerləşən, Xəzərin enerji resurslarının diversifikasiyası da daxil olmaqla Cənub-Şimal və Qərb-Şərq enerji-nəqliyyat dəhlizi olan strateji regionda həyata keçilirən layihələrə qarşı fəaliyyətlərini genişləndirsinlər. Hər iki tərəfdaş dövlətlərin bu qədər mühüm mövzuda narahatlığı üzərindən divident götürməyə çalışan daxili siyasi qruplar və siyasət şoumenlərin  fəaliyyətinin  hədəfi də strateji tərəfdaş olan iki ölkənin münasibətlərinin korlanmasına çalışmaqdır. Burdan isə məntiqi olaraq belə nəticəyə gəlmək olur ki, hər iki ölkədə daxili müxalif  qrupların fəaliyyəti yerli hökümətə deyil, yerli cəmiyyətlərə, xalqa və dövlətə müxalifət olmaqdır”.