Zirveyolu.info xəbər verir ki, bu gün Yasamal rayonu Heydər Əliyev Mərkəzində Yasamal rayon Gənclər və İdman İdarəsinin və «Elin Səsi» Milli-Mənəvi Dəyərlərimizin Qorunması İctimai Birliyinin birgə təşkilatçılığı ilə «Gənclərdə liderlik xüsusiyyətlərinin formalaşdırılması və milli dəyərlər» mövzusunda tədbir keçirildi. Gənclər üçün təşkil olunan tədbirin əsas məruzəçiləri Yasamal rayon Gənclər və İdman İdarəsinin rəisi İlham Səfərov və Azərbaycan Milli Elmlər Akademiyasının (AMEA) Elm Tarixi İnstitutunun (ETİ) şöbəsinin müdiri, «Elin Səsi» Milli-Mənəvi Dəyərlərimizin Qorunması İctimai Birliyinin sədri, siyasi elmlər üzrə fəlsəfə doktoru Elvin Talışınski idi. Tədbirdə tələbələr, bir neçə ictimai birliyin gənc üzvləri, həmçinin KİV nümayəndələri iştirak ediblər. Tədbirin məruzəçiləri İlham Səfərov və Elvin Talışınski gənclərdə liderlik xüsusiyyətlərinin formalaşdırılmasından ətraflı bəhs edərək təlim iştirakçılarına bir sıra tövsiyələrini verdilər. Natiqlər həmçinin çıxışlarında liderliyin mahiyyətindən, onların vəzifələrindən, əsas xüsusiyyətlərindən danışaraq xüsusilə gənclərimizin bu istiqamətdə düzgün şəkildə formalaşmasının böyük əhəmiyyətə malik olduğunu bildirdilər. Onlar eləcə də milli-mənəvi dəyərlərin qorunub saxlanılmasının da vacibliyini qeyd edərək gənclərimizin milli məsələlərdə xüsusi diqqətli olmalarını qeyd etdilər. Sonra söz gənclərə verildi və bir sıra aktual məsələlər ətrafında olduqca maraqlı müzakirə keçirildi. Sonda «Elin Səsi» Milli-Mənəvi Dəyərlərimizin Qorunması İctimai birliyinin üzvləri Qorxmaz Paşayev, Tamerlan Qasımlı və Fidan Cavadzadə, eləcə də Modern Azərbaycan Yeniliklər və Təcrübə İctimai birliyinin üzvləri Camal Kərimli və Firuzə Abuşova Yasamal rayon Gənclər və İdman İdarəsi tərəfindən dövlət gənclər siyasətinin həyata keçirilməsində göstərdikləri səmərəli fəaliyyətlərinə görə fəxri fərmanla təltif edildilər. Sonda tədbir iştirakçıları Heydər Əliyev Mərkəzindəki muzeyi ziyarət edərək xatirə fotoları çəkdirdi.

Müxbir: Cavadzadə Seyid Sürayə