Sumqayıt Dövlət Universiteti “Sumqayıt Dövlət Universitetinin 60 illik yubileyi ilə əlaqədar keçiriləcək konfrans xərclərinin satın alınması” lotu üzrə sifarişçi olduğu satınalmaya noyabr ayının 22-də yekun vurub.
Bu tenderin məbləği 95.303 manat, qalibi isə “FAMİLY 22 FN” Məhdud Məsuliyyətli Cəmiyyəti elan edilib.
Sumqayıt Dövlət Universiteti 95 min manatı NƏYƏ XƏRCLƏNİB?
Sumqayıt Dövlət Universiteti “Sumqayıt Dövlət Universitetinin 60 illik yubileyi ilə əlaqədar keçiriləcək konfrans xərclərinin satın alınması” lotu üzrə 2022-ci ilin noyabr ayının 22-də yekun vurduğu 95.303 manat dəyəri olan tenderdə qalib elan edilən “FAMİLY 22 FN” MMC tenderdən bir ay əvvəl 2022-ci ilin oktyabr ayının 4-də dövlət qeydiyyatından keçib.
“FAMİLY 22 FN” MMC-nin hüquqi ünvanı Bakı şəhəri, Xəzər rayonu, Zirə qəsəbəsi Baş küçəsi ev 2, mənzil 19 ünvanıdır.
MMC-nin nizamnamə kapitalı 10 manat, qanuni təmsilçisi Abdinova Nərgiz İbad qızıdır.
“FAMİLY 22 FN” MMC-nin fəaliyyət profili, müvafiq lisenziyaları barədə internet resurslarında heç bir məlumata rast gəlinmir.
“Dövlət Satınalmaları Haqqında” Azərbaycan Respublikasının Qanununun 6-cı maddəsinin 6.2.1 bəndində malgöndərən-podratçı təşkilatların satınalma müqaviləsinin icrasını təmin etmək üçün müvafiq sahədə peşəkarlığının, təcrübəsinin, texniki və maliyyə imkanlarının, işçi qüvvəsinin, idarəetmə səriştəsinin və etibarlığının olmasının vacibliyi qeyd edilir.
Dövlət başçısının çıxışından nümunə götürə bilməyən Universitet
Prezident İlham Əliyev cənabları Nazirlər Kabinetinin iclaslarında və digər çıxışlarında dəfələrlə dövlət qurumlarının israfçılığa yol vermələri, büdcə vəsaitlərini səmərəsiz xərclədiklərini vurğulayıb.
Prezident 2020-ci ilin birinci rübünün sosial-iqtisadi yekunlarına həsr olunan videokonfrans şəklində olan müşavirədə dövlət təşkilatlarının bəzi hallarda xərcləri şişirtdiklərini qeyd edərək İqtisadiyyat və Maliyyə nazirlərinə bu sahədə ciddi nəzarət mexanizminin tətbiq olunmasını bildirdi.
Lakin belə görünür ki, dövlət başçısının çıxışının mahiyyətini dərk edə bilməyən, dünyanın və regionun iqtisadi böhranda boğulduğu bir zamanda hələ də büdcə vəsaitlərini səmərəsiz işlərə xərcləyən büdcə maliyyəli təşkilatlar var.
Sifarişçi olduğu tenderin predmetlərinə diqqət etdikdə əminliklə demək olar ki, Prezidentin çıxışının ziddinə gedən, büdcə vəsaitlərini havaya sovuran təşkilatlardan biri də Sumqayıt Dövlət Universitetidir.
95.303 manat nəyə xərclənib?
SDU-nun sözügedən tenderinin predmetlərinə görə qalib elan edilən “FAMİLY 22 FN” MMC 500 ədəd SDU loqolu dəri bloknot almalıdır.
Müasir dünyanın inkişaf etmiş ölkələrində, cəmiyyətlərində insanların dəri məhsullarından bütünlüklə imtina etdiyi bir zamanda kollektivinin böyük əksəriyyəti ali savadlı olan, cəmiyyətimizə savadlı kadrlar yetişdirən, övladlarımıza təhsil verən bir ali təhsil ocağı yubileyində dəridən 500 bloknot alınması üçün büdcədən pul xərcləyir.
Tender müqaviləsinin digər predmeti daha biabırçıdır: 500 ədəd SDU loqolu yaxa sancağı tökmə qəlib 1 rəng qutulu. Hər hansı Avropa ölkəsində ali təhsil müəssisəsinin tökmə qəlibli yaxa sancağına büdcədən pul xərcləməsini də təsəvvür edə bilirsinizmi?
Əgər Avropada hansısa universitet belə bir iş görsəydi, cəmiyyətin reaksiyasını hər kəs görərdi.
SDU-nun məlum tenderində daha bir absurd məqam isə 500 ədəd dəvətnamənin alınmasıdır.
Texnologiyanın inkişaf etdiyi, videokonfransların geniş yayıldığı, əlaqə saxlamaq üçün çoxsaylı internet vasitələrinin olduğu bir dövrdə hələ də 60 illik tədbiri üçün 500 ədəd dəvətnamənin alınması absurd olduğu qədər, həm də büdcədən vəsait xərcləmək bəhanədir…
Tender müqaviləsinin predmetlərindən biri də tədbir üçün 500 ədəd SDU loqolu brelokun alınmasıdır. Bundan başqa, gülüş doğuran digər məqam isə SDU-nun büdcədən 95.303 manat xərclədiyi tenderdə “Konfrans materiallarının nəşri”ni 300 sayda sifariş etməsidir.
Ali təhsil müəssisəsi dövlətin büdcəsi hesabına 500 brelok alır, amma 300 jurnal nəşr etdirir. Bu da kitaba, jurnala, elə həmin ali məktəbdə elm və təhsilə verilən qiymətin təzahürüdür.
Xatırladaq ki, Sumqayıt Dövlət Universitetinin rektoru, professor Elxan Hüseynovdur.
E.Hüseynov 2017-ci ildə “Şöhrət” ordeni ilə təltif edilib.Qlobal.az
