Həcər İsgəndərova aidiyyəti qurumlara müraciət etsə də, şikayətinə baxılmır. O iddi edir ki, notarius rəhbəri Ələkbərov Aris Elman oğlu və kəndin bələdiyyə sədri Rasim Allahverdiyev buna mane olmağa çalışırlar. Rayon sakini hətta onlar tərəfindən təhdid olunduğunu da vurğulayır:

“1997-ci ildə mənə pay torpağı verilib. Lakin torpaqdan istifadə etməmişdim. Hazırda torpağım əlimdən alınıb, başqasına, notarius rəhbəri Ələkbərov Aris Elman oğluna satılıb.

Atam 1-ci qrup əlil olub. Hazırda dünyasını dəyişib. Rasim və Aris tərəfindən mənə təhdidlər olunur, lazımsız sözlər deyilir. Öz torpağımı geri istəyirəm, mənə deyirlər ki, bizi məcbur edirsən ki, səni öldürüb torpağa basdıraq, heç kəs də tapa bilməyəcək. Hazırda məktəbdə xadimə işləyirəm. Maddi vəziyyətim çox zəifdir, evim yoxdur. Mənə qalan torpaq kimə satılır? Hansı qanunla satılır? Bələdiyyə sədri Rasim satıb. Bu bələdiyyə sədri Rasim bir dəfə özbaşınalıq etdiyinə görə həbs edilib. Xahiş edirəm ki, mənə kömək edəsiniz. Rüşvətxor məmurların əlində tək qalmışam. Mənə aid olan torpaq qanunsuz olaraq başqasına satılır və orda villa tikilir. Bu nə dərəcədə düzgündür?! Hara müraciət edirəmsə, baxılmır. Məhkəmə, vəkil hamı pul istəyir. Arislə Rasim şikayətimə baxılmasına mane olurlar. Ali savadım yoxdur. Rasim Daşkəsinin Xoşbulaq kəndində bələdiyyə sədri işləyib.

Biz mətbuat vasitəsi ilə Azərbaycan Respublikasının Prezidenti cənab İlham Əliyevdən və Azərbaycan Respublikasının Birinci-Vitse Prezidenti Mehriban xanım Əliyevadan xahiş edirik ki, şikayətimizin yerində bizim iştirakımızla, obyektiv araşdırılıb, Gəncədə yerləşən notarius rəhbəri Aris və kəndin bələdiyyə sədri Rasim adlı şəxslərin barəsində ciddi tədbirlər görülməsinə tapşırıq verəsiniz”.

Şikayətçi isə maddi cəhətdən çox ağır vəziyyətdə olduğunu deyir: “Məhkəməyə pul ödəmək lazımdır, maddi cəhətdən imkanım yoxdur, nə edim, torpağımın əlimdən alınmağına göz yumum? Belə çıxır ki, mənim kimi tək yaşayan qadınların başına belə oyun açılmalıdır. Evim, başqa torpağım yoxdur, harada necə yaşamalıyam mən?! Bu özbaşına məmurların haqsızlıqları nə vaxt sona yetecək?”

Məsələ ilə bağlı Daşkəsən Rayon İcra Hakimiyyətinin Mətbuat və İctimaiyyətlə Əlaqələr Şöbəsinin müdir mavini Elmar Əliyevlə də əlaqə saxladıq. Onun sözlərinə görə, Rasim Allahverdiyev bu cür qanunsuz əməllərinə görə həbsdə olub: “Xanımın işi ilə dünən Hurriyyet.az saytında tanış olmuşdum. Amma nəzərinizə çatdırım ki, bizim qurum bələdiyyənin işinə qarışa bilməz. Bu işə Daskəsən rayonunun kənd bələdiyyəsi baxır. Biz torpaq satmırıq və almırıq. Rasim Allahverdiyev haqqında şikayətlər çoxdur. Dələduzluq etdiyinə və qanunsuz əməllərinə görə həbsdə olub. Hazırda Rasim Allahverdiyevin işinə xitam verilib. O, Xoşbulaq bələdiyəsinin sədri vəzifəsində çalışıb”.

Gəncə şəhər 5 saylı Notarius ofisinin rəhbəri Ələkbərov Aris Elman oğlu ilə də əlaqə saxlamağa çalışsaq da, yenə də mümkün olmadı. Belə ki, o, zəngimizi cavabsız qoymağa davam etdi.

Azərbaycan Respublikası Ədliyyə Nazirliyinin Kommunikasiya qrupunun apardığı araşdırmalar nəticəsində isə aydın olub ki, torpağın sadəcə bir hissəsi Ələkbərov Aris Elman oğlunun həyətinə qarışıb. Ədliyyə Nazirliyinin Kommunikasiya qrupunun verdiyi məlumata əsasən, Həcər xanım və Arıs müəllimlə danışıqlarda razılaşma əldə olunmuşdu. Yəni A.Ələkbərov söz vermişdi ki, xanımın torpağının pulunu ödəyəcək.

Çox təəssüf ki, bu söz sadəcə telefon danışığında qaldı. Xanımın qızı A.Ələkbərovun iş yerinə getsə də, onu qəbul etməyib.

P.S. Əlbəttə, Aris müəllim ona verilən torpağın koordinatını bilməli idi. Bir halda ki, o, dövlət orqanında işləyir, bu işə biz yox, özü vaxtında müdaxilə etməliydi.

Aris müəllim, necə özünüzə sığışdıra bilirsiniz ki, xəstə və tənha qadının pulunu mənimsəyirsiniz? Əgər qadın haqsız olsaydı, bunu sübut etmək üçün əlinizdən gələni edərdiniz. Xanımın torpağında villa tikdirməyiniz bəs deyilmiş kimi, pulunu da mənimsəyirsiz.