Ləğv prosesində olan “Texnikabank” Açıq Səhmdar Cəmiyyəti (ASC) “Bərgüşad-Ş” Mənzil Tikinti Kooperativini (MTK) məhkəməyə verib.
Zirveyolu.info Qaynarinfo-ya istinadla xəbər verir ki, iddia Bakı Kommersiya Məhkəməsinin hakimi Leyla Əliyevanın icraatındadır. 18 yanvar 2023-cü il tarixdə iş üzrə məhkəmə hazırlığı keçiriləcək.
İşin mahiyyəti kredit müqaviləsi üzrə mübahisələrdən ibarətdir.
“Bərgüşad-Ş” MTK 24 mart 2005-ci ildə qeydiyyata alınıb. Nizamnamə kapitalı 25 AZN olan şirkətin qanuni təmsilçisi Əzizov Fəzli Bəhram oğludur. Açıq mənbələrdə Fəzli Əzizov haqqında hər hansı məlumat yoxdur.
Yerli mediada gedən və təkzib olunmayan məlumatlara görə, “Bərgüşad-Ş” MTK Sabunçu rayonunun icra başçısı Adil Vəliyevin nəzarətindədir. MTK-nın adına Adil Vəliyevin oğlu Ənvər Ənvərlinin biznes imperiyası ilə bağlı dərc edilən siyahıda da rast gəlinir.
Bundan əlavə, “Bərgüşad-Ş” MTK əsasən Adil Vəliyevə məxsus olduğu deyilən “Bakıxanov Residens” şirkətinin layihələrində podratçı şirkət qismində iştirak edir.
