ngiltərə Premyer Liqasının VII turunun ertələnmiş oyunları başa çatıb. “Arsenal” evdə “Everton”u, “Liverpul” isə “Vulverhempton”u qəbul edib.

“Zirvə yolu” xəbər verir ki, oyunlar müvafiq olaraq “Emireyts” və “Enfild” stadionlarında baş tutub.

Bakı vaxtı ilə 23:45-də başlayan “Arsenal” – “Everton” matçı ev sahiblərinin xeyrinə bitib. “Topçular”ın birinci qolunu 40-cı dəqiqədə ukraynalı Aleksandr Zinçenkonun ötürməsindən sonra Bukayo Saka vurub. London təmsilçisinin növbəti dəqiq zərbəsi 6 dəqiqə sonraya təsadüf edib. Sakanın ötürməsini Qabriel Martinelli qola çevirib. 73-cü dəqiqədə isə komandanın kapitanı Martin Edeqor hesabı darmadağın həddinə çatdırıb. 80-ci dəqiqədə Martinelli dubla imza ataraq oyunda son nöqtəni qoyub – 4:0.

Bu qələbə sayəsində “Arsenal” turnir cədvəlindəki birinci pillədə yerini bərkidərək 60 xal toplayıb. Beləliklə, Mikel Artetanın yetirmələri çempionatda ən yaxın izləyiçiləri olan “Mançester Siti” ilə xal fərqini 5-ə çatdırıb. “Everton” isə 21 xalla 18-ci pillədə qalıb. Liverpul şəhərinin təmsilçisinin liqadan düşmək təhlükəsi davam edir.

Həftənin digər matçında “Liverpul” “Vulverhempton”u məyus edib. Bakı vaxtı ilə 00:00-da başlayan oyunun birinci yarısı qolsuz heç-heçə ilə sonuclanıb. “Liverpul” hesabı yalnız 73-cü dəqiqədə dəyişə bilib. “Qırmızı”ların müdafiəçisi ikinci cəhddən topu tora qovuşdura bilib. Niderlandlı futbolçuya dəqiq ötürməni Dioqo Jota verib. Dörd dəqiqə sonra Məhəmməd Salah fərqi artıraraq oyundakı yekun hesabı müəyyənləşdirib – 2:0.

Beləliklə, Yurgen Kloppun komandası 39 toplayaraq turnir cədvəlində 6-cı pilləyə yüksəlib. 19 qat Premyer Liqa qalibinin Çempionlar Liqasında vəsiqə qazandıran ilk dördlükdən 6 xal ayırır. “Vulverhempton” isə 24 xalla 15-ci pillədə qalıb. Liqanın növbəti turunda “qurdlar” paytaxtın “Tottenhem” komandası ilə (martın 4-də), mersisaydlılar isə əzəli rəqibləri “Mançester Yunayted”lə qarşılaşacaqlar (martın 5-də).