Bir neçə gün əvvəl Rusiya Xarici İşlər Naziri Sergey Lavrovun Azərbaycana gəlməsi birmənalı qarşılanmadı. Politoloqlar bu səfəri müxtəlif səbəblərlə izah etməyə çalışdılar. Sergey Lavrov açıqlamalarında Azərbaycanla mədəni əlaqələrdən, ötən il imzalanan müttəfiqlik haqqında bəyannamədən, münasibətlərin 30 illiyi və s. mövzulardan söz açdı.
Bəs bu səfərin əsas məqsədi nə idi?
Zirveyolu.info-ın məlumatına görə, Milli Məclisin deputatı Arzu Nağıyev Bizimyol.info xəbər portalına açıqlamasında bildirib ki, bir il əvvəl Azərbaycan və Rusiya arasında müvafiq bəyannamə imzalanıb. Bu səfərdə məqsəd bəyannaməyə uyğun olaraq, siyasi, iqtisadi, hərbi işlərin görülməsi, regional məsələlərin çözülməsi istiqamətində müzakirələrin aparılması idi.
“Burada ən ciddi məsələlərdən biri 10 noyabr sazişinə uyğun olaraq, Azərbaycan-Ermənistan münasibəti, Zəngəzur dəhlizinin açılması məsələsidir”-deyən deputat qeyd edib ki, son zamanlar Avropa İttifaqı Ermənistanı həm Kollektiv Təhlükəsizlik Müqaviləsi Təşkilatından, həm də, Avrasiya İqtisadi Birliyindən çıxarmağa çalışır.
Deputatın fikrincə, birmənalı şəkildə Avropa İttifaqı, daha doğrusu Fransa çalışır ki, Ermənistanı bir müstəmləkə kimi istifadə etsin. Bu da təbii ki, Rusiyaya sərf etmədiyi üçün Rusiya buna imkan da verməz. Bu səbəbdən də bu gəlişin məqsədini tək mədəni əlaqələrlə əlaqələndirib, belə bir kontekstdə təqdim etmək düzgün olmaz. Burada hərtərəfli əlaqələr məsələsi var.
“Qonşuluq siyasəti ilə bağlı, eyni zamanda sülhməramlı qüvvələrin Azərbaycanda fəaliyyəti məsələsi, 10 noyabr sazişindəki hər bir imzaya hörmətlə yanaşılması məsələsi və s. digər problemlərin çözülməsi üçün bu görüş mütləq şəkildə lazım idi”-deyə deputat qeyd edib.
Deputatın fikrincə, Moskvanın Vardanyan planının uğursuzluğa düçar olması və s. digər məsələlər siyasi gedişlərdir. Rusiya regionda ciddi fiqurlardan biridir. Rusiya ilə Azərbaycan arasında olan münasibət də normaldır.
“Yəni biz heç vaxt xarici siyasətimizdə plansız addım atmamışıq. Bu səbəbdən bizim öz xarici siyasətimiz var. Bu, Rusiya və digər dövlətlərlə də eyni şəkildə qurulur. Sadəcə olaraq Qərb çalışır ki, Ukrayna Rusiya müharibəsindən istifadə edərək, regionda daha çox nüfuz sahibi olsun. Bu da Rusiyaya xoş gəlmir. Məhz buna görə də məsləhətləşmələr aparmaq, eyni zamanda müvafiq addımlar atmaq üçün Rusiya çalışır ki, regionun lider dövləti olan Azərbaycanla da fikir mübadiləsi aparsın”-deyən deputatın fikrincə, burada əsas məsələ Azərbaycan və Rusiya arasında münasibətlər, bu münasibətlərin gələcəkdə perspektiv inkişafı, region üçün əhəmiyyətli olan məsələlər və gələcəkdə xarici siyasətdə atılacaq addımların müzakirəsindən ibarətdir.
