2022-ci ildə “Kaspersky” təhlükəsizlik həlləri Azərbaycanda kriptovalyutaların oğurlanmasına yönəlmiş 3 milyon 700 mindən çox fişinq hücumunun qarşısını alıb.
“Zirvə yolu”nun “Kaspersky Laboratoriyası”na istinadən verdiyi məlumata görə, bu, 2021-ci illə müqayisədə üç dəfə çoxdur. Bank kompüteri və zərərli mobil proqramlar kimi ənənəvi maliyyə təhlükələri üzərindən edilən hücumlar daha az yayılıb. İndi fırıldaqçılar diqqətlərini kriptosənayesi də daxil olmaqla yeni sahələrə yönəldirlər.
Keçən il kriptovalyuta məkanında fişinq hücumları əhəmiyyətli dərəcədə artıb və ayrıca fırıldaqçılıq kateqoriyasına daxil edilib. Əgər 2021-ci ildə bu cür hücumların sayı mindən bir qədər çox idisə, 2022-ci ildə onların sayı üç dəfədən çox artıb, məlumatda deyilir. Kriptofişinq sayında analoji artım 2021-ci ildə kriptovalyuta bazarında qeydə alınan qeyri-sabit vəziyyətlə bağlı ola bilər.
Kriptovalyuta ilə bağlı fırıldaqların əksəriyyətində fırıldaqçılıq və ya saxta ödəniş səhifələrinə rast gəlinir. Bununla belə, təcavüzkarlar daim yeni üsullarla çıxış edirlər. Məsələn, kampaniya çərçivəsində istifadəçi poçt vasitəsilə ingilis dilində PDF faylı alır və bu sənəddə onun uzun müddət əvvəl kriptovalyuta bulud mədənçiliyi platformasında qeydiyyatdan keçdiyi bildirilir. Guya hesabı deaktiv ediləcəyi üçün ona təcili olaraq külli miqdarda valyuta çıxarmaq təklif olunur. Faylda saxta mədən platformasına keçid yer alır. Kriptovalyutanı çıxarmaq üçün istifadəçi formanı doldurmalıdır: şəxsi məlumatı, o cümlədən kart məlumatlarını və hesab nömrəsini daxil etməlidir. Sonra o, kripto pul kisəsi vasitəsilə və ya birbaşa göstərilən pul kisəsi ünvanına müəyyən komissiya ödəməlidir.
Kriptovalyutadan təhlükəsiz istifadə etmək üçün “Kaspersky” mütəxəssisləri tövsiyə edirlər:
– Fişinqə qarşı diqqətli olun: fırıldaqçılar tez-tez insanları aldadaraq giriş məlumatlarını və ya gizli açarlarını açmağa inandırmaq üçün fişinq e-poçtlarından və ya saxta veb-saytlardan istifadə edirlər. Həmişə saytın URL-ni iki dəfə yoxlayın və şübhəli linklərə keçid etməyin;
– Gizli açarlarınızı paylaşmayın: onlar kriptovalyuta cüzdanınızın kilidini açacaq. Açarları gizli saxlayın və heç bir halda başqaları ilə bölüşməyin;
– Maariflənin: kriptovalyutanızı qorumaq üçün ən son kiber təhdidlər və ən yaxşı təcrübələrdən xəbərdar olun. Öz müdafiəniz haqqında nə qədər çox bilsəniz, kiberhücumların qarşısını almaq üçün bir o qədər çox hazır olacaqsınız;
– İnvestisiya etməzdən əvvəl məlumatı araşdırın: hər hansı kriptovalyutaya investisiya etməzdən əvvəl layihəni və onun arxasında duran komandanı diqqətlə öyrənin. Layihənin qanuni olduğundan əmin olmaq üçün layihənin vebsaytını, texniki sənədləşməsini və sosial medianı yoxlayın;
– Təhlükəsizlik proqramından istifadə edin: etibarlı təhlükəsizlik həlli cihazlarınızı müxtəlif növ təhlükələrdən qoruyacaq. “Kaspersky Premium” bütün məlum və naməlum kriptovalyuta fırıldaqlarının və kriptovalyuta mədənçiliyi üçün kompüterinizin emal gücündən icazəsiz istifadənin qarşısını alır.
