Bugünlərdə “Hürriyyət”in redaksiyasına müraciət edən Sabunçu rayonu, Bakıxanov qəsəbəsi, Deputat küçəsi, ev 1A sakini, kiçik sahibkarlıqla məşğul olan Rəhilə Abbas qızı Cavadova adıçəkilən rayonun icra başçısı Adil Vəliyevin göstərişi ilə dəmiryolu stansiyası yanında ona məxsus olan 72 kvadratmetrlik dükanın, içərisində 20 min manat dəyəri olan avadanlıqla birlikdə traktorla dağıdıldığını, yerlə bir edildiyini iddia edib.
“Razılaşmaya əsasən icra başçısı sahibkarlara hər kvadratmetr üçün 1200 manat verəcəyini bildirdi, sıra mənə çatanda isə icra nümayəndəsi dedi ki, sizə hər kvadratmetr üçün 800 manat veriləcək”
Üzləşdiyi hadisə ilə bağlı müvafiq qurumlara müraciət etdiyini, lakin hələ də problemin həll olunmadığını deyən şikayətçinin sözlərinə görə, Sabunçu Rayon İcra Hakimiyyətinin başçısı Adil Vəliyev ona və digər dükan sahiblərinə verdiyi vədə əməl etməyib: “Sabunçu Dəmiryol Stansiyası yanında 100-ə yaxın ticarət obyekti vardı. Həmin cərgədə mənim də 72 kvadratmetr sahəsi olan dükanım var idi. 2013-cü ilin mart ayında Sabunçu rayon icra başçısı tərəfindən bütün mağaza sahibləri görüşə dəvət olundular. Görüşdə Adil Vəliyev bildirdi ki, ərazidə yenidənqurma işləri aparılmalıdır. O dedi ki, mağazalarınız müasir tələblərə uyğun olmadığından sökülüb yerində yeni ticarət mərkəzi tikiləcək. Əlavə etdi ki, söküləcək mağazaların əvəzinə həmin ticarət mərkəzində hər bir sahibkara öz kvadratmetrinə uyğun yer veriləcək və bizimlə qanuni şəkildə üçtərəfli müqavilə bağlanacaq. Tərəflərdən biri Sabunçu Rayon İcra Hakimiyyəti, ikincisi sahibkar və üçüncüsü isə tikinti aparan qurum olacaq. Biz icra başçısından tikinti müddətində nə ilə dolanacağımızı soruşduqda o, qeyd etdi ki, hər bir sahibkara sahib olduğu dükanın sahəsinə uyğun məbləğ təyin ediləcək. Bildirdi ki, həmin məbləğ icra hakimiyyəti tərəfindən veriləcək və müqavilədə əks olunacaq. Adil Vəliyev dedi ki, həmin məbləği dövr etdirib ailənizi dolandırarsınız, ticarət mərkəzi tikilib hazır olanda isə məbləği geri qaytararsınız, biz də mağazalarınızı sizə təhvil verərik. Beləcə, icra başçısının sözlərinə inanıb onunla razılaşdıq. Razılaşmaya əsasən icra başçısı sahibkarlara hər kvadratmetr üçün 1200 manat verəcəyini bildirdi. Mən də daxil olmaqla hər bir sahibkar bu məbləğlə razılaşdıq. Bir neçə gün sonra sıra ilə sahibkarlar müqavilə bağlayıb pullarını aldılar. Sıra mənə çatanda icra nümayəndəsi bildirdi ki, sizə hər kvadratmetr üçün 800 manat veriləcək. Səbəb kimi mağazamın ikinci cərgədə olduğu deyildi. Təbii ki, bununla razılaşmadım. Dedilər ki, bu, Sabunçu Rayon İcra Hakimiyyətinin başçısı Adil Vəliyevin tapşırığıdır. Bununla bağlı dəfələrlə icra hakimiyyətinə üz tutsam da, heç bir xeyri olmadı. Nəhayət, bir dəfə icra başçısı məni qəbul etdi. Ona narazılığımı bildirdim və ailə vəziyyətim haqda məlumat verdim. Dedim ki, 5 övladımdan ikisi I qrup əlil, digəri isə İkinci Qarabağ savaşı – Vətən Müharibəsi qazisidir. Çox ağır durumda olduğumu qeyd etdim. İcra başçısı isə bunlara məhəl qoymadan “Hara istəyirsən şikayət et” deyərək, məbləği artırmayacağını bildirdi. Bu zaman “Mənə də hamı kimi hər kvadratmetr üçün 1200 manat verilməyincə mağazamın sökülməsinə icazə verməyəcəm” dedim. Ancaq bunun heç bir faydası olmadı, bir ay sonra xəbər çatdı ki, icra başçısı obyektimi yerlə-yeksan edib. İnsan nə qədər qəddar olmalıdır ki, mağazanı içərisi 20 min manat dəyərində avadanlıqla birlikdə traktorla dağıtsın”.
“İcra Hakimiyyətinin baş hüquqşünası Neyman Əzizov “Kimə şikayət etsəniz də heç bir nəticəsi olmayacaq. Ancaq başçının dedikləri olacaq. İstər məhkəmədə, istərsə də prokurorluqda tanışları var. Boş yerə pul xərcləyəcəksiniz”, deyə cavab verdi”
Bundan sonra həyat yoldaşı ilə birlikdə icra başçısının qəbuluna düşməyə çalışdığını vurğulayan Rəhilə Cavadova qeyd edib ki, Adil Vəliyevlə görüşə bilməsə də, icra hakimiyyətindən onlara bu işin birbaşa başçının nəzarətində olduğunu bildiriblər: “Bir-neçə dəfə get-gəldən sonra icra başçısının qəbuluna düşə bildik. Adil Vəliyev məbləği bir qədər artıraraq, bizə hədə-qorxu gələrək son olaraq 65 min manat verəcəyini dedi. Biz razılaşmayıb otağı tərk etdik. Sonra Sabunçu Rayon İcra Hakimiyyətinin baş hüquqşünası Neyman Əzizovun qəbuluna getdik. O, bizi normal qarşılasa da, bu işlə bağlı köməklik edə bilməyəcəyini qeyd etdi. Neyman Əzizova icra başçısından şikayət edəcəyimizi dedik də isə “Kimə şikayət etsəniz də heç bir nəticəsi olmayacaq. Ancaq başçının dedikləri olacaq. İstər məhkəmədə, istərsə də prokurorluqda tanışları var. Boş yerə pul xərcləyəcəksiniz”, deyə cavab verdi. Beləcə, Sabunçu Rayon İcra Hakimiyyətinin baş hüquqşünası bizə 65 min manatı alıb sakit durmağı məsləhət gördü”.
Sabunçu Rayon İcra Hakimiyyətinin başçısı Adil Vəliyevin əməllərini vəzifədən sui-istifadə edib sadə vətəndaşları əzmək, onların hüquqlarını tapdamaq kimi qiymətləndirən şikayətçi iddia edir ki, icra hakimiyyətində onun həyat yoldaşı şantaja, təhdidə məruz qalıb: “Sabunçu Rayon İcra Hakimiyyətinin yetkili şəxsləri həyat yoldaşıma hədə-qorxu gəlib, onu həbslə şantaj ediblər. Belə ki, icra nümayəndəsi Adil Vəliyevin birinci müavini Şakir Alıyevə “İcra başçısı bildirib ki, əgər həmin məbləğlə razı olmasa, narazılıq edib şikayət etsə, əlimizdə – 13-cü polis bölməsində onun həyat yoldaşı haqda video kaset var. Zəng edin polisə və tapşırıq verin ki, onun haqqında cinayət işi qaldırsınlar”, deyə təhdid ediblər. Həyat yoldaşım bilib ki, onu şərləyib, şantaj edib obyekti əlimizdən almaq istəyirlər. Bu səbəbdən də dərhal icra hakimiyyətini tərk edib. Bir müddət sonra yenidən icra başçısının birinci müavini Şakir Alıyevin qəbulunda olduq. O, Sabunçu Dəmiryol Stansiyası yanındakı ticarət mərkəzinin tikintisinin 5-6 il çəkəcəyini bildirdi və bu səbəbdən də Bakıxanov qəsəbəsi, M.Fətəliyev küçəsində 1 il ərzində tamamlanacaq yeni ticarət mərkəzində istədiyimiz mağazanı seçə biləcəyimizi dedi. Beləcə, çarəsiz qalıb bu təkliflə razılaşdıq və oradan mağaza götürdük. Bununla da M.Fətəliyev küçəsində tikilən ticarət mərkəzinin layihəsində 1-ci və 2-ci mağazanın üstünə bizim adımızı yazdılar. Lakin aramızda əladə olunan bu razılaşmaya dair sənəd təqdim etmədilər. Nəhayət, 10 ay sonra Sabunçu Rayon İcra Hakimiyyətinin baş hüquqşünası Neyman Əzizov bizi qəbula çağırdı və dedi ki, sizə verilən pulun hamısını gətirin, sənədləşmə işlərinə başlayırıq. Bildirdim ki, hələ mağazaların təmiri qalıb, suvağı, işığı, suyu yoxdur, yollar çəkilməyib. Qeyd etdi ki, 1-2 aya hamısı düzələcək. Onda dedim ki, sizə 65 min yox, 55 min verəcəm, tam hazır olanda isə yerdə qalan 10 mini də verərəm. Neyman Əzizov razılaşdı və pulu ona verdim. Lakin bunun üzərindən 5 ay keçdikdən sonra gördüm ki, başqa biri bizə ayrılan mağazanı təmir edir. O dedi ki, mağazanı icra başçısı Adil Vəliyevdən alıb. Bu barədə Neyman Əzizovlə söhbət zamanı o dedilənləri təsdiqlədi və bütün məsuliyyəti icra başçısının birinci müavini Şakir Alıyevin üstünə atdı. Həmin vaxt Şakir Alıyevin 4-5 ay əvvəl işdən azad olunduğunu öyrəndik”.
Məhz bundan sonra Sabunçu Rayon İcra Hakimiyyəti tərəfindən dəfələrlə aldadıldığını, digər mağazanın veriləcəyinə dair çoxsaylı vədlər verildiyini, lakin heç birinə əməl olunmadığını vurğulayan şikayətçinin sözlərinə görə, üzləşdiyi haqsızlıqla bağlı birinci vitse-prezident Mehriban Əliyevaya, baş nazir Əli Əsədova, daxili işlər naziri Vilayət Eyvazova, baş prokuror Kamran Əliyevə və Bakı Şəhər İcra Hakimiyyətinin başçısı Eldar Əzizova müraciət etsə də, heç bir nəticəsi yoxdur: “Odur ki, “Hürriyyət” vasitəsi ilə yenidən adıçəkilən rəhbər şəxslərə və digər müvafiq qurumların yetkililərinə müraciət edərək, onlardan ailə vəziyyətimizin ağır olduğunu, o cümlədən 5 övladımdan ikisinin I qrup əlil, digərinin isə Vətən Müharibəsi qazisi olduğunu nəzərə alaraq, Sabunçu Rayon İcra Hakimiyyətinin başçısı Adil Vəliyev tərəfindən bizə qarşı edilən haqsızlıqların aradan qaldırılmasına yardım etmələrini xahiş edirəm”.
“Hürriyyət”
