“Sahil – S İnşaat” MTK-nın 165 ailəsi Baş Prokuror Kamran Əliyevə və Korrupsiyaya qarşı Mübarizə Baş İdarəsi rəisi Nazim Rəcəbova müraciət edib. Fırıldaqçı tikinti şirkətinin rəhbəri Taley Alaverdiyevlə illərdir ki, başı bəlada olan sakinlər onun həbsindən sonra indi də qardaşı Şükür Alaverdiyevin qanunsuz əməlləri ilə üzləşiblər. Anaxeber.info-ya verilən məlumata görə, sakinlər Baş Prokurordan və İdarə rəisindən həbs edilmiş dələduzun qardaşı Şükür Alaverdiyevin şirkəti idarə etmək üçün saxta möhür-ştamp hazırlamasını araşdırmağı xahiş ediblər. Məlum olub ki, indi də şirkətin başına keçmək və özbaşınalıqları davam etdirmək üçün Taley Alaverdiyevin qardaşı çırmanıb. Sakinlər bildiriblər ki, onun MTK-nı idarə etməyə heç bir səlahiyyəti çatmır, hər hansı hüququ yoxdur. Çünki baş vermiş hadisələrdən sonra MTK rəhbərliyi həbs olunub, onların cinayət əməlləri barədə istintaq sübutlar ortaya qoyub, məhkəmədə hökm oxunacaq. “Bunun ardınca biz sakinlər olaraq kollektiv bir idarəçilik təsis etmişik, cəmiyyət qurmuşuq və birgə idarəetmə mövcuddur. Yəni sakinlər MMC yaratmaqla özləri binanın yarımçıq qalan tikinti işlərini, kommunal məsələlərini, lift quraşdırılması və digər infrastruktur işlərini həyata keçiriblər. Bütün bunlar öz resurslarımız hesabına, kifayət qədər ağır və çətin proseslərdən keçməklə mümkün olub. Biz 165 ailə olaraq öz mənzillərimizə köçmək üçün dəridən-qabıqdan çıxmışıq, uzun müddət mübarizə aparmışıq, dövlət də sağ olsun ki, hər zaman yanımızda olub. Lakin cənab prokuror, indi də bu dələduzun qardaşı peyda olub. Görünür ki, Taley həbsdən Şükürə təlimat verib, bu adam da qanunsuz şəkildə saxta möhür yaradıb işin başına keçməyə hazırlaşır. Ona görə də Sizdən rica edirik, bu məsələni araşdırıb yoluna qoyun. Çünki bir mənzili bir neçə adama satmış dələduz Taleydən sonra qardaşı Şükür min oyundan çıxmağa başlayacaq. Biz binanı özümüz idarə edə bilirik, hər bir məsələni qanun çərçivəsində həll etməyə nail oluruq, burada bütün narazılıqlara özümüz son qoymağa çalışırıq, amma yenə də kənardan hansısa haram əllər saxta yolla müdaxilə edir, bizə əngəl olur. 165 ailəni illərlə öz halal mənzilinə köməkdən məhrum etmiş bu dələduzları yaxın buraxmaq olmaz. Uşaqlarımız aylarla, illərlə təzə evə köçməyi gözləyiblər, indi belələri gəlib suyu bulandırmağa çalışır”. Sakinlər Baş Prokuror Kamran Əliyev və İdarə rəisi Nazim Rəcəbovdan köməklik göstərilməsini xahiş edirlər.

Anaxeber.info