Uşaqların sağlam və balanslı böyüməsi hər bir valideynin ən böyük arzusudur. Lakin təkcə maddi təminat deyil, psixoloji və emosional mühit də uşağın formalaşmasında mühüm rol oynayır. Psixoloqların fikrincə, valideynlərin gündəlik davranışları, yanaşmaları və övladla münasibət tərzi uşağın gələcək şəxsiyyət inkişafının əsasını qoyur.

Mövzu ilə bağlı psixoloq A.Orucova Sonxeber.az-a açıqlama verib:

Psixoloq uşaqların tərbiyəsində nəzərə alınmalı əsas məqamları belə sıralayıb:

Sevgi və qəbul – Uşaq hər şeydən əvvəl sevgini və dəyərli olduğunu hiss etməlidir. Valideynin şərtsiz sevgisi uşağın özünə inamını gücləndirir.

Münasibətdə sabitlik – Uşağa qarşı davranışlarda ziddiyyət olmamalıdır. Valideynin sabit mövqeyi uşağa güvən hissi aşılayır.

Hədd və qaydalar – Qaydaların aydın şəkildə qoyulması uşağın davranış sərhədlərini anlamasına kömək edir. Lakin bu qaydalar sərtlik yox, sağlam intizam üzərində qurulmalıdır.

Dinləmək və anlamaq – Uşağın fikirlərini, hisslərini dinləmək onun özünü ifadə etməsinə şərait yaradır və ailə içi ünsiyyəti gücləndirir.

Məsuliyyət hissinin formalaşdırılması – Kiçik yaşlardan uşağa öz otağını toplamaq, sadə qərarlar vermək kimi məsuliyyətlər tapşırılmalıdır. Bu, gələcəkdə müstəqil şəxsiyyət kimi yetişməsinə təkan verir.

Müsbət nümunə olmaq – Uşaqlar sözlərdən çox valideynlərin davranışlarını təqlid edirlər. Ona görə də valideyn ilk növbədə öz davranışı ilə örnək olmalıdır.

Psixoloji təhlükəsizlik – Qışqırmaq, alçaltmaq və ya müqayisə etmək uşağın psixikasında dərin izlər buraxır. Ən böyük qorunma vasitəsi sevgi dolu və anlayışlı mühitin yaradılmasıdır.

Psixoloqun sözlərinə görə, uşağın gələcəkdə sosial münasibətlərdə uğurlu olması və özünə güvənən şəxsiyyət kimi formalaşması məhz bu sadə, amma çox vacib prinsiplərin gündəlik həyatda tətbiqindən asılıdır.